ԱԺ-ում ճեպազրույցների ժամին ԱԺ խմբակցությունների ներկայացուցիչներն անդրադարձան ԵԽԽՎ-ի՝ Հայաստանի կողմից Ղարաբաղն օկուպացնելու մասին հայտարարությանը և ԵԽԽՎ-ում հայաստանյան պատվիրակության մեղքի բաժնին:
ՀՀ ԱԺ ՀԱԿ խմբակցության ղեկավար Լևոն Զուրաբյանը կարծում է, որ այս հարցում առաջին հերթին թերացել է ՀՀ նախագահ Սերժ Սարգսյանը. «Նա վարել է այնպիսի անհեռատես ու ոչ կոմպետենտ քաղաքականություն, որը թույլ է տալիս ՀՀ-ն միջազգային հանրության աչքերում պատկերել որպես ագրեսոր: ԵԽԽՎ-ում այդ հայացքը ձևավորվեց 2005-ին՝ դեռ Քոչարյանի օրոք: Տեր-Պետրոսյանի պաշտոնավարման ժամանակ ոչ միայն նման բան չկար, այլև կային փաստաթղթեր, որոնք ցույց էին տալիս, որ միջազգային հանրությունն ընկալում է Ղարաբաղի հակամարտությունը որպես պայքար Ղարաբաղի ինքնորոշման համար, մինչդեռ 2005-ից սկսած փոխվեց ԵԽԽՎ աշխարհայացքը` այն ներկայացվում է որպես ՀՀ-ի և Ադրբեջանի միջև տարածքային վեճի խնդիր: Դա Սերժ Սարգսյանի ու Ռոբերտ Քոչարյանի վարած ոչ կոմպետենտ քաղաքականության հետևանքն է»:
Հարցին` անձամբ Լևոն Զուրաբյանն ի՞նչ է անում ԵԽԽՎ-ում, որպեսզի այդ կառույցում հայանպաստ որոշումներ կայացնեն, օրինակ` նշված հարցի վերաբերյալ ի՞նչ աշխատանքներ է տարել, պարոն Զուրաբյանը պատասխանեց. «Կես տարի առաջ ես մանրամասն բացատրություն եմ տվել, թե ինչ սխալներ է կատարել ՀՀ իշխանությունը, ԱԳՆ-ն և պատվիրակությունը: Երբ բանաձևի մասին հարցն էր քննարկվում, ես պատվիրակության նիստին տվել եմ ճիշտ ռազմավարության իմ առաջարկները, որոնք մերժվել են: Ի վերջո, գլխավոր պատասխանատուն մեր դիվանագիտական ձախողումների՝ Սերժ Սարգսյանն է ու նրա վարած քաղաքականությունը»:
ԲՀԿ խմբակցության պատգամավոր Վահան Բաբայանը արդարացավ, թե իրենք բավարար աշխատանքներ տանում են. Նաիրա Զոհրաբյանը երկու օր առաջ համազեկուցողների հետ քննարկմանն իր մտահոգությունն է հայտնել այդ առիթով: ԵԽԽՎ առաջիկա նստաշրջանին էլ անելու են ամեն ինչ: Դառնալով քննադատություններին՝ ասաց. «Ամպագոռգոռ հայտարարություններից բացի, իրենց հարթակները հօգուտ ՀՀ-ի և ԼՂՀ-ի թող օգտագործեն, այլ ոչ թե մերկապարանոց հայտարարություններ անեն պատվիրակության անդամների վերաբերյալ: Գաղտնիք չէ, որ Ադրբեջանը փորձում է նմանատիպ բանաձևերի և արտահայտությունների միջոցով դիվիդենդներ հավաքել»:
Կարդացեք նաև
ՀՀԿ խմբակցության ղեկավար Վահրամ Բաղդասարյանը նշեց, թե ԵԽԽՎ-ում հայաստանյան պատվիրակության ղեկավար Հերմինե Նաղդալյանի աշխատանքից դժգոհ չեն. «Աշխատել է իր և խմբակցության հնարավորությունների սահմանում»: Այնուհետև նշեց, թե հաջողված բանաձևեր էլ ենք ունեցել:
Երբ հարց հնչեց` արդյոք ԵԽԽՎ-ում Ղարաբաղի հարցով հաջողված բանաձև երբևէ ունեցե՞լ ենք, պարոն Բաղդասարյանը հորդորեց չշտապել ու եզրահանգումներ չանել, քանի որ գործընթացը շարունակվում է. «Ղարաբաղի հետ կապված տրամադրությունները դեռ բացահայտված չեն, ու լրիվ լիարժեք չեն: Մենք հիմնվում ենք ավելի շատ Մինսկի խմբի կարծիքների վրա: Դեռ վաղ է խոսել դրա մասին, թե ով ավելի շուտ հաջողության կհասնի:
Մենք դեռ ժամանակ ունենք, և պետք չէ շտապողականություն ցուցաբերել»:
Տաթև ՀԱՐՈՒԹՅՈՒՆՅԱՆ
