Այսօր ԱԺ-ում շատ սպասված հյուր էր Եվգենի Բիբինը՝ ՀԷՑ-ի գլխավոր տնօրենը:
Սակայն Բիբինը հարկ չի համարել գալ խորհրդարան եւ պատասխանել պատգամավորների հարցերին:
Խորհրդարանում ԱԺ տնտեսական հարցերի մշտական հանձնաժողովի նախագահ Վարդան Այվազյանը հայտարարեց, որ Բիբինին հրավիրել են, սակայն նա ինչ-ինչ պատճառներով չի եկել: ԲՀԿ խմբակցության ղեկավար Նաիրա Զոհրաբյանը Բիբինի չգալը որակեց որպես լկտի պահվածք Հայաստանի օրենսդիր մարմնի հանդեպ: Նրա խոսքերով՝ Բիբինը կարողանում է ժամանակ գտնել ու գործակալություններին հարցազրույց տալ, բայց ԱԺ գալու ժամանակ չունի՞:
Այս առնչությամբ Aravot.am-ը ՀՀԿ խմբակցության ղեկավար Վահրամ Բաղդասարյանին հարցրեց՝ ՀՀԿ խմբակցության անդամները, երբ հանդիպում էին Բիբինի հետ ԱԺ-ում, Դուք լրագրողներից մեկուսացրեցիք Բիբինին՝ մեզ ասելով, որ լսումներին կգա, ինչ հարց ուզում եք՝ կտաք, հիմա ինչո՞ւ չկա նա, ո՞ւր է Բիբինը: Վահրամ Բաղդասարյանը պատասխանեց. «Մենք շատ վա՛տ ենք ընդունում նրա պահվածքը: Երեւի այդ հարցապնդումներին չդիմացան: Ես չգիտեմ ինչն էր պատճառը: ՀՀԿ խմբակցության քննարկման ժամանակ եղել են շատ սուր հարցապնդումներ: Այսօր գրավոր դիմել է Բիբինը հանձնաժողովին, նաեւ ֆրակցիա է նամակ ուղարկել՝ պատճառաբանելով, որ իրենք իրենց ամբողջական կարծիքը տեղադրել են կայքում եւ նպատակահարմար չեն գտնում, որպեսզի ներկայանան: Մինչեւ այսօր առավոտյան չի եղել նման տեղեկություն, որ իրենք չեն գալու: Այսօր են նամակով դիմել»:
Կարդացեք նաև
Մեր հարցին՝ սա արհամարհանք չէ՞ մեր պետության եւ օրենսդիր մարմնի նկատմամբ՝ Վահրամ Բաղդասարյանը պատասխանեց. «Բնականաբար: Եվ մենք շատ վատ ենք ընդունում: Դա ավելի շատ իրենք ասելիք չունեն, իրենք պատասխան չունեն տալու: Մարդը եթե ունենում է ասելիք, կարող է բացահայտ նմանատիպ ամբիոնից ասել իրենց հիմնավորումները»:
Մեր հարցին՝ չարժե՞ դրա համար պատժել իրենց՝ Վահրամ Բաղդասարյանը պատասխանեց. «Ինձ թվում է, որ իրենց սեփականատերը, իրենց կառույցը այս հարցը քննարկման կենթարկի: Մենք շատ բացահայտ ձեւով ուղարկել ենք հրավերները, բայց մարդիկ այդպես են նպատակահարմար գտել: Բնականաբար, հիմա կսկսեն լուտանքներ, դրա պատասխանը որեւէ ձեւով չի տրվելու, եւ հանրությունը կընդունի դա իրականություն: Եթե իրենք լինեին, պատասխաններ տային, կարող է դրանց մի մասը ընդունվեր: Ինչ վերաբերում է Բիբինին փախցնելուն, ես որեւէ ցանկություն չունեմ, նմանատիպ խնդիրներ լիներ՝ ես չէի հրավիրի: Ես մեծ դժվարությամբ պատրաստեցի, կազմակերպեցի այդ քննարկումը, որը շատ անկեղծ եղավ: Եթե ԶԼՄ-ներ լինեին, այդ 5- ժամյա խոսակցությունը չէր լինի»:
Հռիփսիմե ՋԵԲԵՋՅԱՆ
