ՀՅԴ խմբակցության քարտուղար Աղվան Վարդանյանը ԱԺ-ում ճեպազրույցի եկավ այսպիսի տրամադրությամբ. «Շնորհավորում եմ, որ քառօրյան ավարտվեց: Մի լավ կհանգստանաք, որ հետո այլ որակի իրադարձությունների ականատես լինեք: Մեկնարկելու են սահմանադրական բարեփոխումները, հանրաքվեն, հետո նախընտրական զարգացումներ: Դեռ ինչերի եք ականատես լինելու»:
Այնուհետև նշեց, թե ոչ պակաս հետաքրքիր իրադարձություն է սպասվում քիչ անց՝ նկատի ունենալով էլեկտրաէներգիայի սակագնի թանկացման վերաբերյալ լսումները՝ դրանք որակելով «մանանեխ ճաշից հետո»:
Դառնալով հանրաքվեի մասին օրենքում փոփոխություններ մտցնելու մասին նախաձեռնությունը, պարոն Վարդանյանը նշեց, թե սահմանադրական փոփոխությունների գործընթացից են բխում հանրաքվեի փոփոխությունները, ընդամենը օրենսդրության համապատասխանության համար է դա արվում: Դառնալով իրենց դեմ հնչած քննադատություններին՝ պարոն Վարդանյանն ասաց. «Կան մարդիկ, որոնք ամեն ինչ հիմա ու միանգամից են ուզում՝ պապից ավելի պապական մոտեցումներով»:
Անդրադառնալով ՌԴ Պետդումայի պատգամավոր, Ռուսաստան-Ադրբեջան միջխորհրդարանական բարեկամության խմբի ղեկավար Դմիտրի Սավելիևի հայտարարություններին, թե Լեռնային Ղարաբաղի շուրջ գտնվող 7 տարածքները անմիջապես պետք է վերադարձվեն Ադրբեջանին, պարոն Վարդանյանը նախ կասկածի տակ դրեց ադրբեջանական կայքի հավաստիությունը, բայց հավելեց. «Եթե նման բան է ասել, ուղղակի մեզ էլ մնում է ասել՝ արի վերցրու, եթե կարող ես»:
Կարդացեք նաև
Դառնալով ԵԽԽՎ բանաձեւի նախագծում ներառված այն դրույթին, թե Հայաստանը օկուպացրել է Ղարաբաղը, Աղվան Վարդանյանը նշեց, թե դա նորություն չէ, դա սկսել էր այն ժամանակ, երբ զեկույցի պատրաստման մասին հարց բարձրացվեց, ինչը հակազդեցության արժանացավ. «Վեհաժողովում ձևավորվել է ադրբեջանական լոբբիի ստվար զանգված, մի անգամ նման բան նրանք արեցին, բայց մեր պատվիրակությունը բոյկոտեց: Կարողացան տապալել, այժմ կարծես պրոբլեմներն ավելի շատ են: Մեր խելքն ու հնարավորությունները անսահմանափակ ուժի գործոններ չեն»:
Հարցին՝ յոթ շրջանների մասին հայտարարությունները ի՞նչ են նշանակում, պետք է վերադարձնե՞նք, պարոն Վարդանյանն ասաց. «Ղարաբաղյան խնդրի կարգավորումը կլինի կամ համապարփակ լուծումներով, միակողմանի լուծումները բացառվում են»:
Հարցին՝ սա չի՞ նշանակում, որ մեր պատվիրակությունը ԵԽԽՎ-ում անարդյունավետ է աշխատում, ՀՅԴ խմբակցության պատգամավորը նշեց. «Հայկական պատվիրակությունն իր հնարավորությունների շրջանակներում աշխատում է: Եթե քննադատողները կարծում են, որ իրենք նշանակվեն պատվիրակության անդամ՝ իրենց ընտանիքների անդամներով, հարյուր տոկոսով կփոխվեր իրավիճակը, սխալվում են: Կան մի շարք գործոններ՝ ադրբեջանական լոբբին, աշխարհաքաղաքական գործոններ: Եվրոպա-Արևմուտք հարաբերությունների ֆոնի վրա սա մի լրացուցիչ ազդակ է ադրբեջանական լոբբիի ուժեղացման: Քանի դեռ մենք կարողանում ենք պահպանել Մինսկի խմբի ձևաչափը, և դա կարող է փոփոխության ենթարկվել լինել միայն բոլոր կողմերի համաձայնությամբ, որևէ լուրջ հետևանքներ նման բանաձևերը չեն կարող ունենալ: Բայց դրա դեմ պետք է պայքարել»:
Տաթև ՀԱՐՈՒԹՅՈՒՆՅԱՆ
