Այսօր ԱԺ-ում 2014-ի բյուջեի կատարման հաշվետվության քվեարկությունից հետո փոխվարչապետ Վաչե Գաբրիելյանից Aravot.am-ը հետաքրքրվեց՝ Սերժ Սարգսյանն ասում էր, որ երկրում կա գաղջ մթնոլորտ: Այդ մթնոլորտը Հովիկ Աբրահամյանի կառավարության օրոք փոխվե՞լ է, թե՞ չի փոխվել:
Նա պատասխանեց. «Ինձ համար ավելի դժվար է գնահատել մթնոլորտը, քանի որ ես օդերեւութաբան չեմ: Բայց մթնոլորտի վերաբերյալ գնահատականը պետք է տա մամուլը: Կա որոշակի բարելավում, բայց դեռեւս հասարակության մեջ շարունակում է որոշակի բեւեռացվածություն, որը գնալով նվազում է: Դա դրական միտում է: Բայց որ բեւեռացվածության մթնոլորտը բարձր է, դա կա»:
Մեր հարցին՝ Դո՞ւք էլ եք կարծում, որ այդ գաղջ մթնոլորտի մեղավորը լրատվամիջոցներն են, վատ են ներկայացնում իրավիճակը եւ արտագաղթում են մարդիկ՝ նա պատասխանեց. «Չեմ կարծում, որ հասարակության մեջ որեւէ բան չկար, լրատվամիջոցները եկան ստեղծեցին: Ուղղակի ԶԼՄ-ները, ելնելով իրենց տնտեսական տրամաբանությունից, վատ լուրեր ծախելու շահութաբերությունից, իրավիճակը սրելու եւ ավելի մեծ լսարան ձեռք բերելու տրամաբանությունից, աշխատում են այդ ուղղությամբ: Մամուլին պետք է վերաբերվել հենց այդպես, եթե մամուլը չունի որոշակի կարգավորումներ»:
Կարդացեք նաև
Հռիփսիմե ՋԵԲԵՋՅԱՆ
