ՄԱԿ-ի Կայուն Զարգացման Լուծումների Ցանցի կողմից վերջերս հրապարակված «Երջանկության համաշխարհային երրորդ զեկույցում» Հայաստանը զբաղեցրել է 127-րդ հորիզոնականը: Հեղինակները 158 երկրներին դասակարգել են՝ ելնելով Գելլափի 2012-15թթ․ հետազոտության արդյունքներից ուսումնասիրելով երջանկության մակարդակներին նպաստող առանցքային գործոնները։
Զեկույցի համաձայն՝ 2015 թվականի ամենաերջանիկ երկիրը Շվեյցարիան է: Ամենաերջանիկ հնգյակում Շվեյցարիային հաջորդում են Իսլանդիան, Դանիան, Նորվեգիան և Կանադան: Իսկ Արևմտյան Աֆրիկայի Տոգո երկրի բնակիչները նշվել են որպես ամենադժբախտը։
Զեկույցի նպատակն է ողջ աշխարհում քաղաքականության մշակողներին տրամադրել նոր չափման միավոր: Այն ավելի է շեշտադրում բարեկեցության սուբյեկտիվ ընկալումը: Եկամուտը զգալի տեղ է գրավում երջանկությունը խթանելու գործում, բայց այն միակ գործոնը չէ: Հետազոտության համաձայն՝ սոցիալական կապերը, կյանքի տեւողությունը, բարեկրթությունը, անձնական ազատությունը եւ կոռուպցիայի մակարդակները եւս մեծապես պայմանավորում են երջանկության մակարդակը:
Զեկույցը նաեւ քաղաքականության մշակողներին զգուշացնում է, որպեսզի չգերագնահատեն եկամտի դերը։ «Երբ երկրները ՀՆԱ-ին հետևում են միակողմանիորեն՝ մոռանալով սոցիալական և շրջակա միջավայրի խնդիրների մասին, արդյունքները կարող են բացասական լինել մարդկանց բարեկեցության համար: Վերջին տարիներին շատ երկրներ տնտեսական աճ են ունեցել ի հաշիվ եկամտի անհավասարության կտրուկ աճի և շրջակա միջավայրին հասցրած մեծ վնասի»,-նշվում է զեկույցում։
Կարդացեք նաև
Պատրաստեց Աշոտ ԻՍՐԱԵԼՅԱՆԸ
