Այսօր հատուկ օպերացիայի ընթացքում ոստիկանները Մոսկվայի կենտրոնում կրակ են բացել: «Մոսկվա» գործակալության փոխանցմամբ՝ միջադեպի ականատեսներից մեկը պատմել է, որ ժամը 15:00-ի սահմաններում, մետրոյի «Պավլեցկայա» կայարանի շրջակայքում մի մոխրագույն միկրոավտոբուս արգելափակել է լուսաֆորի տակ կանգնած ներկայացուցչական դասի մեքենան եւ նրան ուղեկցող երկու այլ մեքենաներ:
Միկրոավտոբուսից ավտոմատներով զինված մի քանի մարդ է դուրս եկել եւ կրակ է բացել այդ մեքենաների վրա: «Կրակոցների տակ ընկածները արագ շարժվել են եւ թեքվել ձախ: Միկրոավտոբուսը հետապնդել է նրանց: Կրակոցների տակ ընկած մեքենաների վրա երեւում էին փամփուշտների հետքեր: Մի քանի փամփուշտներ էլ դիպել են մոտակայքում կայանված մեքենաներին»,- գործակալությանը փոխանցել է դեպքի ականատեսներից մեկը:
Այնուհետեւ միջամտել են ոստիկանները եւ հետապնդել են կրակողներին: «Ոստիկանությունը մի խումբ տղամարդկանց է ձերբակալել: Նրանք փորձում էին սեւ մեքենայով փախչել, փոխհրաձգություն է տեղի ունեցել: Հետապնդումից հետո մեքենան հնարավոր եղավ կանգնեցնել միայն անիվների վրա կրակելու միջոցով»,- «Ռիա» գործակալությանն է փոխանցել իրավապահ համակարգի աշխատակիցը:
Կարդացեք նաև
Ավելի ուշ տարածած հաղորդագրությունում ոստիկանությունը նշել է, որ տուժածներ չկան:
Պատրաստեց Աշոտ ԻՍՐԱԵԼՅԱՆԸ
