Նախագահի աշխատակազմն իր աշխատակիցներից մեկի գործուղման համար 848 հազար դրամ արժողությամբ բիզնես կարգի ավիատոմս է գնել: Նախագահականն օգտվել է «Սպուտնիկ» ընկերության ծառայություններից: Ավիատոմսը նախատեսված է Երեւան-Մոսկվա-Լառնակա-Աթենք-Երեւան երթուղու համար: Այս մասին տեղեկանում ենք կառավարության կայքէջի «մեկ անձից գնումներ» բաժնից:
Համեստությամբ չի փայլում նաեւ կրթության եւ գիտության նախարարությունը, որը Ավստրիայի ուղղությամբ երկու ավիատոմս է գնել: Ուշագրավն այն է, որ ավիատոմսերից մեկը նույն օրվա եւ նույն ուղղությամբ բիզնես կարգի է` 565 հազար դրամ արժողությամբ, մյուս ավիատոմսի արժեքն էլ` 278 հազար դրամ: Այսինքն` ԿԳՆ պաշտոնյաներից մեկը, որն իր պաշտոնով ավելի բարձր է թռչելու բիզնես կարգով, մյուսը, որը հավանաբար շարքային չինովնիկ է, օգտվելու է նույն ինքնաթիռի էկոնոմ կարգից: Ընդհանուր առմամբ, ավիատոմսերի համար ԿԳ նախարարությունը վճարել է 843 հազար դրամ: ԿԳՆ-ն ավիատոմսերը գնել է «Վինդռոուզթրավել-պրո» ընկերությունից:
Նույն աղբյուրից տեղեկանում ենք, որ Ազգային ժողովն իր աշխատակիցների անգլերենի պարապմունքների համար ֆիզիկական անձ Սյուզաննա Խաչատրյանին կվճարի 234 հազար դրամ`13 պարապմունքի համար: Դասընթացը սկսնակների համար է եւ յուրաքանչյուր պարապմունքի համար անգլերենի ուսուցիչը կստանա 18 հազար դրամ:
Պաշտպանության նախարարությունն էլ մեկ անձից` «Զինառ» ընկերությունից մեկ անգամ 1 միլիոն 541 հազար դրամի ֆուրշետ է պատվիրում: Ի դեպ, ֆուրշետ պատվիրելու համար ՊՆ-ն մշտապես այս ընկերության ծառայություններից է օգտվում:
Սննդամթերքի անվտանգության պետական ծառայությունը օդորակիչների վերանորոգման համար վճարել է 372 հազար դրամ: ՀՀ դատական դեպարտամենտը «Կարկոմավտո» սերվիսին վճարել է կես միլիոնից ավելի գումար՝ ընդամենը մեկ ավտոմեքենայի վերանորոգման համար:
Կարդացեք նաև
Այս տարի ՀՀ ոստիկանությունը 1 միլիոն 192 հազար դրամի դիզինֆեկցիոն գործողություն է արել: Ոստիկանությանն ախտահանել է Երեւանի կանխարգելիչ ախտահանում ընկերությունը:
Լուսինե ԲՈՒԴԱՂՅԱՆ
