Ի՞նչ առնչություն ունի Կապանի փոխոստիկանապետը
Զանգեզուրի պղնձամոլիբդենային կոմբինատից դիզվառելիքի գողության հետ
Օրերս հայտնի դարձավ, որ ոստիկանապետի հրամանով պաշտոնանկ է եղել Կապանի ոստիկանության բաժնի պետի օպերատիվ աշխատանքների գծով տեղակալ Հայկ Հովհաննիսյանը։ Թե ինչու, ինչ պատճառով, պաշտոնապես ոչինչ չասվեց: «Առավոտի» տեղեկություններով, սակայն, պաշտոնանկությունը կապված է Զանգեզուրի պղնձամոլիբդենային կոմբինատից դիզվառելիքի հափշտակությունների գործերով Կապանի քննչական բաժնի բացահայտումների հետ։
Պարզվում է, որ Կապանի քննչականը քրեական գործ է հարուցել Կապանի փոխոստիկանապետ Հայկ Հովհաննիսյանի կողմից վկաների նկատմամբ ճնշումներ գործադրելու համար՝ ՀՀ քրեական օրենսգրքի 309-րդ հոդվածի 1-ին մասով։
Դիզվառելիքի հափշտակության դեպքի առթիվ քննվող քրեական գործով մասնակից են հենց Զանգեզուրի պղնձամոլիբդենային կոմբինատի աշխատակիցները՝ ներքին ավտոհավաքակայանի պետն ու նրա ենթական՝ ավտոհավաքակայանի ավագ երթակարգավարը, ովքեր 2015թ. հունվարից մինչեւ մայիսի 15-ն ընկած ժամանակահատվածում ընկերության անսարք ավտոմեքենաների համար կազմել են դիզելային վառելիք ու բենզին ստանալու իրավունք վերապահող կեղծ փաստաթղթեր եւ ստացել շուրջ 4 մլն դրամի վառելիք։
Կապանի ոստիկանապետի տեղակալը կարծես թե այնքան էլ հակված չի եղել գործի բացահայտման հարցում ու փորձել է ողջ պատասխանատվությունը բարդել երթակարգավարի վրա՝ պաշտպանության տակ վերցնելով ավտոհավաքակայանի պետին։ Ըստ «Առավոտի» աղբյուրի, վկաների հավաստմամբ՝ ոստիկանության Կապանի բաժնի պետի օպերատիվ աշխատանքների գծով տեղակալ Հայկ Հովհաննիսյանը սպառնացել է իրենց ու պահանջել, որպեսզի ավտոհավաքակայանի պետի անունը չտան։
Այդ պատճառով Կապանի քննչական բաժնի քննիչը քրեական գործ է հարուցել իրենց տարածքի ոստիկանապետի տեղակալի նկատմամբ, որն իսկական իրարանցում է առաջացրել Կապանի ոստիկանության բաժնում։
Կարդացեք նաև
Երբ քննիչը հարուցված քրեական գործի մասին հաղորդում է ներկայացրել հաշվառման համար, Կապանի ոստիկանության բաժնում որոշ աշխատակիցներ վրդովվել են կատարված փաստից ու անգամ սպառնացել էին թույլ չտալ, որ առհասարակ քննիչները մուտք գործեն իրենց շենք։
Ի դեպ, ինչպես Կապանում, այնպես էլ մի շարք մարզերում առայժմ քննչական բաժինները դեռեւս տեղակայված են ոստիկանության շենքերում: Ոստիկանների տրամաբանությամբ, քննիչը դեռ բավական չի, որ նստում է իրենց շենքում, հանդգնել է իրենց փոխոստիկանապետի դեմ քրեական գործ հարուցել։ Քանի որ կատարվածի մասին շատ արագ տեղեկացվել էր Երեւանում, արձագանքը եղել է նույնքան կտրուկ։ ՀՀ ոստիկանապետ Վլադիմիր Գասպարյանը ոչ միայն աշխատանքից ազատել է Հայկ Հովհաննիսյանին, ում դեմ Քննչական բաժինը քրեական գործ էր հարուցել, այլ նաեւ նշանակել է ծառայողական քննություն՝ տեղի ունեցած միջադեպի կապակցությամբ։
Ռ. ՄԻՆԱՍՅԱՆ
«Առավոտ» օրաթերթ
09.06.2015
