Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հունիսի 9-ին դատավոր Զարուհի Նախշքարյանի նախագահությամբ սկսվեց նախկին վարչապետ Տիգրան Սարգսյանն ընդդեմ սնանկացած գործարար Փայլակ Հայրապետյանի հայցով նախնական դատական նիստը:
Ըստ հայցադիմումի` Փայլակ Հայրապետյանը 2015թ. մարտի 24-ին shamshyan.com լրատվամիջոցում Տիգրան Սարգսյանի վերաբերյալ իրականությանը չհամապատասխանող սուտ տեղեկություններով զրպարտչական հայտարարություն է արել: Մասնավորապես՝ Փայլակ Հայրապետյանը նշել է, որ «Տիգրան Սարգսյանը պետք է գա քննություն տա ու պարզաբանի 7 մլն և 500 հազար դոլարը, որ իր հաշվին նստել է, այդ գումարներն ի՞նչ է արել…»:
Նախնական դատական նիստին ներկա էին նախկին վարչապետի ներկայացուցիչ, նախկին փոխնախարար, փաստաբան Արամ Օրբելյանը եւ Փայլակ Հայրապետյանի ներկայացուցիչ Գրիշա Բալասանյանը: Իսկ գործում երրորդ անձ հանդիսացող ֆոտոլրագրող Գագիկ Շամշյանը բացակայում էր. Ծանուցման ծրարը դատարան էր վերադարձվել:
Արամ Օրբելյանը հայտարարեց, որ համարում է՝ առանց Գագիկ Շամշյանի հնարավոր է շարունակել նախնական դատական նիստը, սակայն Գրիշա Բալասանյանը այլ կարծիքի էր. «Միջնորդում եմ դատական նիստը հետաձգել, որովհետեւ երրորդ անձի ներկայությունը շատ կարեւոր է այս գործում: Հենց երրորդ անձի ներկայացրած լրատվամիջոցով է այդ հայտարարությունները տարածվել, այսինքն՝ վիճարկվում է այդ հրապարակային ելույթը, հարցազրույցը, ուստի միջնորդում եմ հետաձգել դատական նիստը, որպեսզի պատշաճ ծանուցվի նաեւ երրորդ անձին»:
Կարդացեք նաև
Դատավորը հետաձգեց դատական նիստը, հաջորդ նախնական նիստը տեղի կունենա հուլիսի 15-ին:
Ամի ՉԻՉԱԿՅԱՆ
