ՀՅԴ խմբակցության պատգամավոր Արծվիկ Մինասյանը խորհրդարանում պատասխանեց իր հասցեին հնչեցրած այն մեղադրանքներին, թե հանրաքվեի մասին օրենքում փոփոխություններ կատարելու մասին նախագծում չեն ընդգրկել ՀԱԿ, ՕԵԿ, ԲՀԿ խմբակցությունների առաջարկները:
Երբ պատասխանում էր ՕԵԿ խմբակցության ղեկավար Հեղինե Բիշարյանի դիտողություններին ու նշում, որ ՕԵԿ-ը չի ներկայացրել գրավոր առաջարկ, տիկին Բիշարյանը դահլիճից ռեպլիկ արեց, Արծվիկ Մինասյանն էլ պատասխանեց, թե «չհասկացողը դու ես, տիկին Բիշարյան»:
Դառնալով ՀԱԿ խմբակցության ղեկավար Լևոն Զուրաբյանի հայտարարություններին՝ պարոն Մինասյանն ասաց. «Ցավում եմ, որ Լևոն Զուրաբյանն այդպես էլ չարժևորեց քաղաքական ուժերի հետ աշխատանքի և փոխադարձ հարգանքի ապահովման հնարավորությունը, փոխանակ գոհունակություն հայտնեք, որ ինչ-որ քայլ է արվել դեպի առաջընթաց, նեղ, ճղճիմ հայտարարությունների միջոցով փորձ է արվում հերթական քաղաքական դիվիդենդ շահել: Այն ժամանակ, երբ ՀՅԴ-ն այս բոլոր գաղափարների կրողն էր, ձեր քաղաքական ուժը սկի ծնված էլ չէր: Ավելին՝ կեղծարարության մեջ մասնագիտացված լինելով հանդերձ՝ մեղադրում եք մի քաղուժի ենթադրյալ կեղծիքների մեջ, որը անգամ կասկածի տեղիք չի տվել, ապա ի՞նչ բարոյականությամբ եք դա անում»:
Արծվիկ Մինասյանն ասաց, թե ՀԱԿ-ը ցանկացել է քարոզչության ժամանակի վերանայում, դա ապահովել են, այնուհետև հեգնեց, թե «Միանգամից օրենքում գրեինք, որ հիսուն տոկոսը տալիս ենք ՀԱԿ-ի՞ն»: Զուրաբյանն արձագանքեց. «Ինչի՞ ես սուտ ասում»: Արծվիկ Մինասյանը պատասխանեց. «Ստախոսը դու ես, որ այս ամբիոնից կանգնած ինչ անիմաստ հայտարարություններ ասես անում ես: Այդ աստիճան իրավական տգիտությունն ու անգրագիտությունը չի կարելի այս ամբիոնից հնչեցնել: Ավելին, առաջարկները ներկայացնում եք, թռնում եք Իրկուտսկ է, Յակուտսկ է, հետո գալիս կանգնում այստեղ աշխարհացունց բաներ եք ասում»:
Կարդացեք նաև
Արծվիկ Մինասյանն իր խոսքը եզրափակեց՝ վստահեցնելով, որ վճռական են տրամադրված:
Տաթև ՀԱՐՈՒԹՅՈՒՆՅԱՆ
