Այսօր ԱԺ-ում պետք է քննարկվի 2014-ի բյուջեի կատարման հաշվետվությունը: Այդ առիթով ԱԺ-ում է կառավարության ողջ կազմը՝ Հովիկ Աբրահամյանի գլխավորությամբ:
Լրագրողները փոխվարչապետ Վաչե Գաբրիելյանից հետաքրքրվեցին, թե ինչպես եք մեկնաբանում Հանրային ծառայությունները կարգավորող հանձնաժողովի նախագահ Ռոբերտ Նազարյանի հայտարարությանը, որ էլեկտրաէներգիայի սակագինը կբարձրանա 7 դրամով, ի՞նչ քայլեր է ձեռնարկելու կառավարությունը: Նա պատասխանեց. «Կլինի որոշում կասենք»:
Նա չհստակեցրեց՝ գոնե սոցիալապես անապահով խավերին սուբսիդավորում լինելո՞ւ է, թե՞ ոչ:
Կարդացեք նաև
Գյուղատնտեսության նախարար Սերգո Կարապետյանը նույնպես կառավարության քայլերի մասին որեւէ բան չասաց՝ նշելով, թե որոշում դեռ չկա. «Դեռ չգիտենք ինչքան է բարձրանալու: Հանձնաժողովը երբ որ կորոշի, կասենք մեր դիրքորոշումը»:
Արդարադատության նախարար Հովհաննես Մանուկյանը չցանկացավ ոտքի վրա այդ բազմաոլորտ հարցերին պատասխանել. «Կարծում եմ, այս ամենից մենք պետք է դասեր քաղենք հետագայի համար:
Թե ինչ նկատի ուներ դասեր քաղել ասելով՝ նախարարն ասաց. «Ընդհանրապես ե՛ւ օրենսդրական կարգավորումների տեսանկյունից, ե՛ւ վերահսկողական ավելի արդյունավետ մեխանիզմներ կիրառելուց»:
Դիտարկմանը, որ Էներգետիկայի եւ բնական պաշարների նախարար Երվանդ Զախարյանը հայտարարել էր, որ տեղի է ունեցել գողություն, բայց գործ չի հարուցվում, Հովհաննես Մանուկյանը արձագանքեց. «Գիտեք, էներգետիկայի նախարարը իրավաբան չէ, եւ չի ղեկավարում իրավական կառույց, եւ նա կարող է իր ելույթներում օգտագործել տերմինոլոգիա, որը իրավաբանների տերմինոլոգիայի հետ համահունչ չէ: Այս հարցը պիտի համապատասխան ուսումնասիրության ենթարկվի կոմպետենտ մարդկանց կողմից, ես կարծում եմ, որ եթե ինչ-որ տեղ ինչ-որ խախտումներ են եղել, եւ քրեաիրավական բնութագրիչ ունեցող խախտումներ հայտնաբերվեն, վստահ եմ, որ մեր իրավապահ մարմինները համապատասխան գնահատական կտան»:
Հռիփսիմե ՋԵԲԵՋՅԱՆ
