ՀՀ ԱԺ-ն այսօր շարունակում է աշխատանքները: ՀՀ ԱԺ նախագահ Գալուստ Սահակյանը հայտարարեց, թե «Բաց դռներ» ծրագրի շրջանակներում խորհրդարանում են Վանաձորի թիվ 5 ավագ դպրոցի մանկավարժներն ու աշակերտները:
Խորհրդարանն ընդունեց ՀՀ կառավարության կողմից ներկայացված ՀՀ քրեական օրենսգրքում փոփոխություններ և լրացումներ կատարելու մասին նախագիծը: Քննարկման դրվեց «Հանրաքվեի մասին» օրենքում փոփոխություններ կատարելու նախագիծը:
ՀՀ ԱԺ ՕԵԿ խմբակցության ղեկավար Հեղինե Բիշարյանը քննադատության ենթարկեց այն փաստը, որ խորհրդարանում քննարկվում է հանրաքվեի փոփոխությունների մասին նախագիծ, սակայն դրանում տեղ չեն գտնում ռեալ փոփոխություններ, օրինակ՝ ցուցակների մաքրման հարցը: Նա հայտարարեց. «Բազմաթիվ ընտրությունների համար հիմնաքար է սա լինելու: Բնական է, որ որոշ շահագրգիռ ուժեր պիտի նման փոփոխություններ իրականացնեին, որ իրենց գործընթացն ունենա բարեհաջող ավարտը»:
Տիկին Բիշարյանը մտահոգություն հայտնեց, որ ցուցակների հրապարակման հարցը այդպես էլ չի մտել փոփոխությունների մեջ և նա առաջարկեց հետաձգել գործընթացը և քննարկել այս հարցը:
Կարդացեք նաև
Հեղինե Բիշարյանը որպես օրինակ՝ բերեց Արտաշատում, Աբովյանում և Ալավերդիում տեղի ունեցած ընտրություններում խախտումները, երբ խայտառակ պատկեր գրանցվեց, երբ ուռճացվել է ընտրությունների մասնակցած անձանց թիվը: Տիկին Բիշարյանի մյուս մտահոգությունն այն է, որ մարդիկ ընտրել են պլաստիկ քարտերով, որտեղ չի երևում որևէ կնիք, ինչը քրեական օրենսգրքի խախտում է:
ՀՀ ԱԺ փոխնախագահ Էդուարդ Շարմազանովը հակադարձեց, թե ուռճացում չի եղել, ինքն էլ Ալավերդիում ընտրել է իր անձնագրով:
Ամփոփելով՝ պարոն Շարմազանովն ասաց. «Մամուլին հղումներ մի արեք, հղում կատարեք ձեր կուսակցության մարզային պատասխանատուներին: Եթե ձեր մարզային կառույցն էլ նման հայտարարություն կանի, որ ընտրողների թվերն ուռճացվել են, ես հրապարակային ներողություն կխնդրեմ: Պետք չէ խեղաթյուրել ժողովրդին: Վանքից ես եմ գալիս, աղոթքից դու՞ք ես խոսում»:
Տաթև ՀԱՐՈՒԹՅՈՒՆՅԱՆ
