ԿԳ նախարար Արմեն Աշոտյանը մեկնաբանելով միասնական քննությունների մեկնարկին իր՝ Հայաստանում չլինելը, դա բացատրեց ԵԺԿ քաղաքական համաժողովի հերթական նիստով, որին մասնակցում էր որպես ՀՀԿ փոխնախագահ եւ ո՛չ որպես ԿԳ նախարար: Արմեն Աշոտյանը նշեց, որ դա ընդամենը կարճատեւ արձակուրդ էր. «Որպեսզի ձեզանից հեռու մնամ, վերցնում եմ արձակուրդ եւ գնում եմ աշխատանքներ իրականացնելու որպես կուսակցական: Քննությունների ընթացքից տեղեկացել եմ, եւ պետք չի զարմանալ, որ ԿԳ նախարարը մեկնարկին այստեղ չի, հակառակը պետք է ընդունել որպես լավ նշան առ այն, որ կրթության գործընթացները կարգավորվել են այն աստիճանի, որ կրթության լիազոր մարմնի ղեկավարը կարող է մեկնարկին նաեւ Հայաստանում չլինել: Ավելին ասեմ ձեզ. եթե նայեք եվրոպական երկրները, ապա կտեսնեք, որ շատ քիչ երկիր կա, որտեղ նախարարը գնում է քննությունների: Ես այսօր եկել եմ
ա) դիմորդներին քաջալերելու,
բ) ծնողների հետ խոսելու եւ ձեզ հետ շփվելու համար, ուրիշ առաքելություն չունեմ, որովհետեւ չեմ անհանգստանում ընդունելության քննությունների ընթացքի կազմակերպական եւ խնդիրներից:
Հիմնական աշխատանքը ԳԹԿ-ի կողմից արվել է եւ սա ընդամենը պրոցեսի վերջին մասն է, որ ձեզ տեսանելի է»:
Կարդացեք նաև
Նախարարը խոստովանեց, որ այս օրերին բազմաթիվ նամակներ է ստանում կրթության ոլորտի հետ կապված՝ սկսած ամենազավեշտալի խնդրանքներից մինչեւ իրական խնդիրներ: Նա սակայն, չցանկացած «գաղտնազերծել», թե դրանք կոնկրետ ինչ բնույթի են. «Անձնական գրագրության գաղտնիություն է, չեմ հրապարակի»:
Նախարարը ցավոտ եւ պոտենցիալ պայթունավտանգ որակեց 3 քննություն. «Հայոց լեզվի քննությունը, որից հետո դժգոհություններ են լինում, մաթեմատիկան է, որն ամենամեծ քննությունն է եւ անգլերենը, որովհետեւի հայերիս թվում է, թե շատ լավ անգլերեն ենք խոսում»:
Նա հավելեց, որ քննությունը չպետք է ինքնանպատակ դժվար լինի, այն հեշտ պետք է լինի միջավայրով, գիտելիքները տարանջատելու հնարավորություններով եւ կազմակերպման մեջ:
Գոհար ՀԱԿՈԲՅԱՆ
