ԱԺ ՀՅԴ խմբակցության պատգամավոր Աղվան Վարդանյանի համոզմամբ, էլեկտրաէներգիայի սակագնի բարձրացման հարցի վերաբերյալ խորհրդարանական բաց քննարկում կլինի, որին ներկա կլինեն նաեւ քաղաքացիական նախաձեռնությունների ներկայացուցիչներ: Նա բաց քննարկման մասին լսել է նաեւ ԱԺ նախագահից:
«Եթե որեւէ բան է փոխվել տեղյակ չեմ, իսկ եթե փոխվել է, վատ է: Այդտեղ որեւէ շոուի խնդիր չկա, կարծում եմ ՝ հասարակությունը պետք է առաջին ձեռքից տեղյակ լինի կատարվածի վերբերյալ»,-ասաց պարոն Վարդանյանը՝ անդրադառնալով ՀՀԿ խոսնակ Էդուարդ Շարմազանովի հայտարարությունից, թե եթե շոու չենք ուզում սարքել, ապա էլեկտրաէներգիայի սակագնի հարցի վերաբերյալ քննարկումը փակ անել:
Պարոն Վարդանյանի խոսքով, այդ ոլորտի ոչ արդյունավետ կառավարումն ակնհայտ է. «Իշխանության խնդիրն է բացահայտել պատճառները եւ ստեղծել այնպիսի իրավիճակ, որ հետագայում քաղաքացու համար կանխատեսելի լինեն ոլորտի զարգացումները: Մեկ տարի առաջ համոզում էին, որ պարտքեր են առաջացել ու եթե թանկանա խնդիրները կկարգավորվեն, մեկ տարի չանցած նույն պատմությունն ավելի մեծ պարտքերով: Պետք է այնպիսի լուծումներ գտնել, այնպիսի կառավարում իրականացնել, որ քաղաքացիների համար գոնե հինգ տարի կանխատեսելի լինի՝ ինչ է սպասվում իրեն: Դեռ երեք տարի առաջ նույն մարմինները՝ էներգետիկայի նախարարությունը, հանրային ծառայությունները կարգավորող հանձնաժողովը պետք է հասկանային, որ խնդիրներ կան ու հետամուտ լինեին մեղավորների բացահայտմանը, կանխեին չարաշահումները, բայց չարեցին, ու մենք փաստի առաջ ենք կանգնում արդեն որերորդ անգամ»:
Այսօր ՀՅԴ խմբակցության պատգամավորների մասնակցությամբ տեղի ունեցավ Սոցինտերնի ԱՊՀ-ի, Կովկասի եւ Սեւ Ծովի հանձնախմբի ժողովը: Սոցինտերնի ղեկավար Լյուիս Այալան նկատեց, որ տարածաշրջանում շատ իրադարձություններ են տեղի ունենում, մասնավորապես Թուրքիայում փոփոխություններ են տեղի ունենում հայոց ցեղասպանության ճանաչման գործընթացում:
Կարդացեք նաև
Նա նախադրյալներ է տեսնում ճանաչման գործընթացի դրական միտումների առումով. «Կգա օրը, երբ ցեղասպանության ճանաչումը Թուրքիայի կողմից Թուրքիայի ու Հայաստանի միջեւ ճանապարհ կբացի դեպի պատմության առերերսում ու պատմական ճշմարտություն»:
Արփինե ՍԻՄՈՆՅԱՆ
