Հանրային խորհրդի անդամ Արշակ Սադոյանն ուսումնասիրել է «Հայաստանի էլեկտրական ցանցեր» ընկերության կայքում տեղադրված փաստաթղթերը եւ պարզել, որ հոսանքի թանկացման համար ոչ մի հիմք չկա, քանի որ ՀԷՑ-ը խելքին մոտ ոչ մի հիմնավորում չի ներկայացրել: Պարոն Սադոյանը էլեկտրամատակարար ընկերությունից վերցրել է նաեւ աշխատակիցների հաստիքացուցակը եւ պարզել, որ ամենացածր աշխատավարձը ՀԷՑ-ում 120 հազար դրամն է:
Արշակ Սադոյանին վրդովվեցնում է այն, որ Հանրային ծառայությունները կարգավորող հանձնաժողովին դիմել է մաշվածության ծախսերը 4 միլիարդ դրամից 8 միլիարդ դարձնելու պահանջով. «Ամենասարսափելին այն է, որ հանձնաժողովը,
ծառայելով օտարին, դիտմամբ սահմանել է այնպիսի կարգ, որ թե’ գազամատակարար, թե’ էլէներգիա արտադրող ընկերությունները աշխատում են մարժայով: Ընդհանուր հասույթի 8-12 տոկոսը հաշվում են նրանց շահույթի բաժին: Այսինքն` ինչքան թանկ առնվի գազը սահմանին, բնական է այնքան շատ կլինի այդ ընկերությունների շահույթը: Օգտվելով հանձնաժողովի բանաձեւերից, ինչքան ՀԷՑ-ը թանկ գնի էլեկտրաէներգիա արտադրող կազմակերպություններից, այնքան նրա շահույթը բարձր կլինի»:
Արշակ Սադոյանի խոսքերով, Հանրային խորհուրդը որոշում է ընդունել, որ էներգետիկայի նախարարությունը , նույնպես, պետք է պատասխանատվություն կրի:
Կարդացեք նաև
Հարցին, թե ի՞նչ ուժ ունեն Հանրային խորհրդի որոշումները, պարոն Սադոյանն ասաց, որ խորհուրդը, որը կազմավորվել է ՀՀ նախագահի կարգադրությամբ, որպեսզի կարողանա ուժ ունեցող որոշումներ կայացնել, Սահմանադրության մեջ նրան վերաբերող կետ պետք է փոխվի:
Արշակ Սադոյանը համոզված է, որ հասարակության ճնշումների ներքո պետք է հասնել նրան, որ հոսանքի գինը չբարձրացնեն. «Հանրային ճնշումները էական դերակատարում կունենան, մարդիկ պետք է գնան եւ ասեն` մենք դեմ ենք:
Հերիք է մենք մեզ վախկոտի պես պահենք»:
«Հայաստանի գործատուների հանրապետական միության» անդամ
Գագիկ Սարգսյանը գտնում է, որ էլեկտրաէներգիայի թանկացումը կործանարար հետեւանքներ կունենա բիզնեսի համար եւ վերջին ամիսներին ՀՀ կառավարության` բիզնեսի համար նախատեսած արտոնությունները «մի հարվածով կհավասարվեն զրոյի»:
Լուսինե ԲՈՒԴԱՂՅԱՆ
