Եվրամիության արտաքին հարաբերությունների եւ անվտանգության քաղաքականության բարձր ներկայացուցիչ Ֆրեդերիկա Մոգերինին եւ Հանձնակատար Յոհաննես Հանը համատեղ հայտարարություն են տարածել երեկ Թուրքիայում անցկացված խորհրդարանական ընտրությունների վերաբերյալ:
ԵՄ կայքում հրապարակված հաղորդագրության համաձայն՝ հայտարարությունում մասնավորապես նշված է. «Հունիսի 7-ին Թուրքիայի խորհրդարանական ընտրություններին եղավ ռեկորդային 86 տոկոս մասնակցություն, ինչը Թուրքիայի ժողովրդավարության ամրապնդման հստակ նշան է: Այն փաստը, որ բոլոր մեծ քաղաքական կուսակցությունները ներկայացված կլինեն նոր խորհրդարանում հատկապես կարեւոր է»:
Պաշտոնյաները նշել են, որ սպասում են ԵԱՀԿ/ԺՀՄԻԳ-ի նախնական արդյունքներին եւ եզրակացություններին: «Մենք այժմ սպասում ենք նաեւ նոր խորհրդարանի եւ կառավարության արագ կազմավորմանը եւ միասին ավելի սերտ աշխատելուն: Առաջիկա ժամանակահատվածը ԵՄ-Թուրքիա հարաբերությունների ամրապնդման եւ համագործակցության նոր հնարավորություններ է առաջարկում, ինչը մեր բոլոր քաղաքացիների օգուտն է»:
Պատրաստեց Աշոտ ԻՍՐԱԵԼՅԱՆԸ
