Իջեւանի տարածաշրջանի սահմանամերձ Վազաշեն գյուղից արտագաղթը շարունակվում է: 1985-1987թվականներին Վազաշենի միջնակարգ դպրոցն ուներ 370 աշակերտ: Այս ուսումնական տարում Վազաշենի դպրոցում սովորել է 85 աշակերտ: Դպրոցի տնօրեն Սարգիս Խաչատրյանն ասաց, որ այս տարի կրթօջախն ունեցել է 9 շրջանավարտ: Աշնանը գյուղի դպրոցի առաջին դասարան կհաճախի 2 կամ 3 երեխա: Դպրոցի տնօրենին հարցրինք, թե ինչո՞ւ է նվազում դպրոցի աշակերտների քանակը: Ս. Խաչատրյանն ասաց. «Քոչում են Ռուսաստան»:
Որո՞նք են Վազաշենից արտագաղթի պատճառները: Վազաշենում մարդկանց կյանքը, կենցաղը ծանր է, որին գումարվում է ադրբեջանական գնդակոծությունների վտանգը: 2013թ. Վազաշենում աֆրիկյան ժանտախտից սատկեց 170 խոզ: Վազաշենի գյուղապետ Լորիկ Բադիրյանը դիմեց կառավարություն, որպեսզի աֆրիկյան ժանտախտից անկված անասունների տերերին ֆինանսական աջակցություն տրվի: Այդ հիվանդությունից անասուններ կորցրած 16 վազաշենցի 2013 թվականին աջակցության խնդրանքով նամակ գրեցին կառավարություն, սակայն՝ ապարդյուն: Անասնատերերից շատերը բանկերից վարկեր էին վերցրել, որ խոճկորներ եւ անասնակեր գնեն:
Ոսկան ՍԱՐԳՍՅԱՆ
Հստակ է մեկ իրողություն` հավանաբար Տավուշի մարզպետը սահմանամերձ բնակավայրերում տիրող իրավիճակը հստակ չի պատկերացնում կամ այն պարզապես իրեն չի հետաքրքրում, ինչի վառ ապացույցը թեկուզև թյուր, սակայն ծրագրի ու իրավիճակը մեղմելուն ուղղված գործողությունների բացակայությունն է, իսկ ազգի կառավարությունը պարզապես թքած ունի: Չնայած ավելի քան մեկ տարի է, ինչ Հ.Աբովյանը Տավուշի մարզպետն է, սակայն այդպես էլ չկարողացավ կամ չցանկացավ հանրությանը ներկայացնել, մարզի անկումը կասեցնող իր տեսլականը:
Միգուցե Հ.Աբովյանը մաքսային ոլորտի անփոխարինելի կադր է, սակայն տեղական ինքնակառավարումը, մեղմ ասած, նրան չտրվեց, ավելին, նա իր անտրամաբանական որոշումներով էլ ավելի է նպաստում արտագաղթի խորացմանը /Իջևանի ԲԿ, Իջևանի անտառտնտեսություն, Դպրոցների տնօրենների անտրամաբանակ ընտրություններ, աշխատանքի ներկայանալու փոխարեն սեփական բիզնեսով զբաղվել և այլն/: