Ոստիկանին կծելու ու նրա նկատմամբ բռնություններ կատարելու մեջ մեղադրվող Armenia Today կայքի համակարգող Արգիշտի Կիվիրյանի գործով դատավորը քիչ առաջ հեռացավ խորհրդակցության սենյակ՝ որոշում ընդունելու: Դատավճիռը կհրապարակվի մեկ ժամից:
Հիշեցնենք, որ 2013-ի օգոստոսի 24-ին, Կոմիտաս 5 հասցեում տեղի ունեցած միջադեպից հետո, Արգիշտի Կիվիրյանին մեղադրանք է առաջադրվել՝ ՀՀ քրեական օրենսգրքի 316-րդ հոդվածի 1-ին մասի հատկանիշներով, այն է՝ իշխանության ներկայացուցչի, տվյալ դեպքում՝ ոստիկանության ներկայացուցչի նկատմամբ բռնություն գործադրելը:
Նախքան դատավորի՝ խորհրդակցության սենյակ հեռանալը, դատախազ Երիցյանն ասաց, որ պաշտպանական կողմը խեղաթյուրված է ներկայացրել տուժող Վրթանեսյանի ցուցմունքը: Հետո հերքեց պաշտպանական կողմի պնդումները, թե ինքը քաղաքական պատվեր է իրականացնում Կիվիրյանի դեմ. «Քաղաքական պատվեր այս քրեական գործում չկա, որեւէ անձի՝ ոչ իշխանական ոչ պաշտոնատար անձի կողմից չեմ ստացել: Կիվիրյանի կողմից հանցագործություն է կատարվել, եւ նա պետք է պատժվի՝ անկախ նրանից, թե ով է»:
Դատախազն անդրադարձավ նաեւ Կիվիրյանի փաստաբանների այն փաստարկներին, թե փորձարարության ժամանակ ապացուցվեց, որ Կիվիրյանը մեքենայի հետեւի մասում նստած ձեռքը չկարողացավ հասցնել բռնակին, էլ ուր մնաց հարվածեր գլխով. «Որեւէ փորձարարություն չի արվել, Կիվիրյանը կարող էր կպնել դռանը, թե ոչ, մենք չենք տեսել, որովհետեւ դատարանը նման փորձարարություն անելու միջնորդություն չի բավարարել»:
Կարդացեք նաև
Հետո էլ պաշտպանեց ոստիկաններին, թե նրանք սուտ ցուցմունքներ տալու շահագրգռված չեն, ինչպես պնդում է պաշտպանական կողմը, որովհետեւ կոչված են հասարակական կարգը պաշտպանելու:
«Եթե այս գործով քաղաքական պատվեր չեք ստացել, կասե՞ք՝ որ գործով եք քաղաքական պատվեր ստացել: Էդ ո՞ր գործով են քաղաքական պատվեր ստացած դատախազները ասում՝ քաղաքական պատվեր են ստացել: Այն, որ քաղաքական պատվեր է, յուրաքանչյուրի համար էլ պարզ է»,- առարկեց Կիվիրյանի պաշտպան Լուսինե Սահակյանը:
Հետո դիմեց դատավորին. «Երբ որ հերթով բոլոր գործերը կգնան եվրոպական դատարան, որ կապացուցվի՝ Արգիշտի Կիվիրյանը ապօրինի պահվել է ոստիկանությունում ու հետո վարչական ու քրեական պատասխանատվության ենթարկվել, նոր կիմանաք»:
Կիվիրյանը չցանկացավ օգտվել իր վերջին խոսքի իրավունքից՝ ասելով, որ իրեն ամբաստանյալ չի համարում. «Անմեղսունակը կարող է հավատալ, որ ես կատարել եմ այն գործողությունները, որոնց մեջ մեղադրվում եմ»:
Արփինե ՍԻՄՈՆՅԱՆ
