Վրոցլավում մեկնարկում է ծանրամարտի աշխարհի երիտասարդական առաջնությունը, որին Հայաստանը մասնակցելու է երեք տղաներով:
Մեր ծանրորդները նախապատրաստական վերջին ուսումնամարզական հավաքն անցկացրել են Աբովյան քաղաքում եւ այսօր մեկնում են Լեհաստան:
Ի՞նչ առաջադրանքներ են դրված մեր ծանրորդների առջեւ եւ նրանք պատրա՞ստ են լուծելու դրանք: «Առավոտը» զրուցել է Հայաստանի ծանրամարտի ֆեդերացիայի փոխնախագահ Վահան Խեչանյանի հետ:
– Պարոն Խեչանյան: Ընդամենը երեք տղա է մասնակցելու աշխարհի առաջնությանը: Ովքե՞ր են նրանք:
– Չնայած երիտասարդ տարիքին, նրանք քաջածանոթ են հայ մարզասերներին. 77 կգ՝ Անդրանիկ Կարապետյան, 85 կգ՝ Նորայր Ավետիսյան եւ +105 կգ՝ Սիմոն Մարտիրոսյան: Անդրանիկին ու Սիմոնին ներկայացնելու անհրաժեշտություն, կարծում եմ, չկա: Նրանք նաեւ Հայաստանի մեծահասակների ազգային հավաքականի անդամ են: Նորայրը 19 տարեկան է եւ անցած տարի նվաճել է Եվրոպայի երիտասարդների փոխչեմպիոնի կոչումը: Մեր մարզչական խորհուրդը նպատակահարմար է գտել մրցավայր գործուղել այս երեք մարզիկներին՝ հավատացած լինելով, որ բոլորն էլ Վրոցլավում ի վիճակի են պայքարել ոչ թե ընդհանրապես մեդալի, այլ՝ որակյալ մեդալների համար:
Կարդացեք նաև
– Ծանրորդների նախապատրաստությունն ինչպե՞ս է անցել:
– Առանց որեւէ խնդրի: Ֆեդերացիայի նախագահ Արմեն Շահազիզյանն այդ խնդրին շատ մեծ կարեւորություն է տալիս: Պլանավորված բոլոր ուսումնամարզական հավաքները կազմակերպվել են ժամանակին: Ամեն բան արվել է: Մնում է, որ ծանրորդները մրցահարթակում անեն այն, ինչ կարող են:
– Անդրանիկ Կարապետյանն ու Սիմոն Մարտիրոսյանը, ինչպես ասացիք, նաեւ մեծահասակների հավաքականի անդամ են: Որքան հասկացա, նրանք ամեն ջանք գործադրելու են ամենաբարձր տեղ զբաղեցնելու համար: Նոյեմբերին կայանալու է մեծերի աշխարհի առաջնությունը: Նրանք կհասցնե՞ն վերականգնել ուժերը եւ Հյուսթոնում էլ արժանիորեն հանդես գալ: Մանավանդ, որ աշխարհի առաջնությունը նաեւ վարկանիշային է ու մենք այսօրվա մեր հինգ ուղեգրերը պահպանելու, նույնիսկ՝ մեկով ավելացնելու նպատակ ունենք:
– Մարզիչները վստահ են, որ կհասցնեն: Մեր գլխավոր նպատակն իսկապես 2016 թվականի օլիմպիական խաղերին տղամարդկանց ամբողջական թիմով մասնակցելն է: Դրա համար անելու ենք ամեն բան: Ինձ ուրախացնում է այն, որ մեր հավաքականում արդեն կան քաշային կարգեր, որտեղ մարզիկների միջեւ լուրջ մրցակցություն է գնում՝ հավաքականում տեղ զբաղեցնելու համար: Մասնավորապես, 77 կգ քաշային կարգում Անդրանիկը Եվրոպայի չեմպիոն Տիգրան Մարտիրոսյանի «դեմ է պայքարում»: Սիմոն Մարտիրոսյանը 105 կգ-ից տեղափոխվել է գերծանր քաշային կարգ: Իսկ այնտեղ Ռուբեն Ալեքսանյանն է ու Գոռ Մինասյանը: Այնպես որ, Սիմոնը դեռ ապացուցելու բան ունի:
– Վրոցլավում Հայաստանը նաեւ մրցավար ունի՝ Հայաստանի ծանրամարտի ֆեդերացիայի գլխավոր քարտուղար եւ տղամարկանց ազգային հավաքականի գլխավոր մարզիչ Փաշիկ Ալավերդյանը, որն արդեն մրցավայրում է:
– Այո, պարոն Ալավերդյանը նաեւ միջազգային կարգի փորձառու մրցավար է եւ միջազգային ֆեդերացիան վստահել է նրան ու ցանկացել օգտվել նրա ծառայություններից:
ԱՇՈՏ ՀԱԿՈԲՅԱՆ
«Առավոտ» օրաթերթ
06.06.2015
