300 տարվա պատմություն ունեցող Մառնեուլի շրջանի Ախքյորփի հայկական գյուղը, հավատարիմ քրիստոնեական հավատքին, միշտ իր կրոնական ծեսերն ու արարողությունները կատարում էր հնամյա ու գեղատեսիլ Խուճապի հայոց վանքում: Սակայն եկեղեցու պատկանելության հետ կապված խնդիրների հետևանքով, շուրջ 200 տնտեսություն ներկայացնող տեղի բնակչությունը ներկայումս զրկվել է քրիստոնեական իր ծեսերն ու արարողությունները հավուր պատշաճի կատարելու հնարավորությունից:
Բնակչության հոգևոր կյանքը հագեցնելու նպատակով, Վիրահայոց թեմի առաջնորդարանի գործունեության արդյունքում տեղում կազմակերպվում են արտագնա Սուրբ Պատարագներ, Եկեղեցական տոնակատարություններ, հոգևոր արարողություններ: Դրանցից մեկը ընդհանրական մկրտությունն էր, որ Ախքյորփի գյուղում մեծ շուքով իրականացվեց 2015 թվականի հունիսի 6-ին, Թբիլիսիի Սուրբ Էջմիածին եկեղեցու հոգևոր սպասավոր Տեր Մանուկ քահանա Զեյնալյանի ձեռամբ:
Առավոտյան վաղ մայրաքաղաքից Ախքյորփի ժամանած Վիրահայոց թեմի պատվիրակության, «Հայարտուն» կենտրոնի ստեղծագործական խմբերի և բազում ուխտավորների մասնակցությամբ, գյուղի 1861 թվականի կառույց Սուրբ Աստվածածին քարաշեն եկեղեցու բացօթյա տարածքում սկսվեց բնակչության մկրտությունը հայոց Առաքելական Սուրբ Եկեղեցու բոլոր կանոններին համապատասխան:
Դիմելով հավաքված բազմությանը, հոգևոր Հայր Տեր Մանուկ քահանան, քարոզի խոսք ասաց օրվա խորհրդի՝ Սբ. Գրիգոր Լուսավորչի Վիրապից ելքի մասին և արժևորեց Մկրտության խորհրդով այդ օրը Ախքյորփի գյուղի քրիստոնյա բնակչության համար անմոռանալի և տոնական դարձնելու կարևորությունը: Հոգևոր հայրը Մկրտության Սրբազան կանոններով քրիստոնեական Սուրբ մյուռոնով օծեց յոթ տասնյակից ավելի տարբեր հասակի երեխաների ու մեծահասակների, ահելների ու ջահելների:
Կարդացեք նաև
Մկրտությունից հետո գյուղի հանրային դպրոցի հրապարակում, կրթօջախի տնօրենի պաշտոնակատար Վիոլետա Սուքիասյանի, գյուղապետ Գիգոլ Աթաբեկյանի օժանդակությամբ և Թբիլիսիից ժամանած «Հայարտուն» կենտրոնի ղեկավար Լևոն Չիդիլյանի ղեկավարությամբ, «Տարոն» երիտասարդական համույթի, անհատ կատարողներ Աննա Պողոսովայի, Անի Հովհաննիսյանի, Ռուզաննա Միքայելյանցի, Հովհաննես Շահնազարյանի, Լիզա Թորոսյանի մասնակցությամբ ու Սերգեյ Արությունովի երաժշտական ձևավորմամբ տրվեց ճոխ համերգ: Հայկական ժողովրդական և ժամանակակից, ազգագրական և հայրենասիրական երգն ու պարը, հոգեթով ասմունքն ու ուրախ երաժշտությունը մինչև երեկո տարածվեց գյուղում: Ստեղծված բարձր տրամադրությունը վայելում էին բոլորը, միանալով հայկական ավանդական «Քոչարիին» և միասնական շուրջպարին, որը Թբիլիսիից ժամանած հյուրերի հետ միասին պարում էր գրեթե ողջ գյուղը:
Հընթացս համերգի,Լևոն Չիդիլյանը և Տեր Մանուկ քահանա Զեյնալյանը բոլոր մկրտվածներին շնորհավորեցին քրիստոնեական Սուրբ մյուռոնով օծվելու կապակցությամբ և անուն- առ անուն բաժանեցին Մկրտության վկայական: Ի նշանավորումը տոնական օրվա և ընդհանրական մկրտության կատարվեց մատաղով հյուրասիրություն:
Հայ Առաքելական Ուղղափառ Սուրբ
Եկեղեցու Վիրահայոց Թեմ
