Այսօր ԱԺ պետա-իրավական հարցերի հանձնաժողովում քննարկվեց ՀՀ Քրեական եւ Վարչական իրավախախտումների վերաբերյալ օրենսգրքերում փոփոխություններ եւ լրացումներ կատարելու մասին կառավարության նախագիծը:
Նախագծի նպատակն է գործող օրենքներով հաստատված թմրամիջոցների, հոգեմետ դեղերի, ներգործուն նյութերի ցանկը ՄԱԿ-ի կոնվենցիաներով ամրագրված ցուցակներին համապատասխանեցնել: Բացի այդ, գործող օրենքներում հոգեմետ դեղերի ու նյութերի անունների մեջ որոշակի վրիպակներ ու տառասխալներ կան, որոնք ուզում են վերացնել:
ՀԱԿ խմբակցության պատգամավոր Գագիկ Ջհանգիրյանը զեկուցող փոխոստիկանապետ Վարդան Եղիազարյանին ասաց, որ ներկայացված դեղերի ցանկը շատ նեղ մասնագիտական է. «Նյութեր են, թույներ են, հաբեր են՝ խիստ կոնկրետ քաշերով, միլիգրամներով: Մենք ավելի շատ պետք է վստահենք մասնագիտական փորձաքննությանը: Հիմա մեզ 2012-ին վստահեցրեցին, որ այդ բոլորը նայել են, կշռել են, գրել են, ջնջել են, փորձել են, հիմա նորից մենք վերանայում ենք, էլի գրում ենք ՄԱԿ եւ այլն: ՄԱԿ-ը 2012-ին էլ կար: Սա կապված չի՞ ԵՏՄ-ի, միասնական մաքսային տարածքի հետ, որովհետեւ եթե ՄՄ որեւէ երկրում այս նյութի կամ հաբի այլ չափաբաժին է գործում, եթե նա այնտեղ խախտեց սահմանը, հետո տեղափոխվեց մեզ մոտ, պիտի մեր մոտ էլ նույն խստությամբ պատիժը լինի: Այս արգումենտը հիմնավորումներում չգտա, կա՞ դա, թե՞ չկա»:
Փոխոստիկանապետը պատասխանեց, որ ԵՏՄ-ի հետ կապված դեռ չեն քննարկել. «Ճիշտ եք ասում, դա արդեն հաջորդ փուլն է լինելու»:
Կարդացեք նաև
Գագիկ Ջհանգիրյանի խոսքերով՝ «Կիրգիզիայում բոլորը թմրանյութեր օգտագործում են: Վաղը մեկը ջեբերը լցրած եկավ ստեղ, ի՞նչ է լինելու»: Փոխոստիկանապետը պատասխանեց, որ մտահոգությունն ընդունում է եւ այդ ուղղությամբ կաշխատեն:
Հանձնաժողովը նախագիծը դրական եզրակացությամբ որոշեց ընդգրկել լիագումար նիստերի օրակարգում:
Հռիփսիմե ՋԵԲԵՋՅԱՆ
