«Քաղաքացիների ներգրավվածությունը ՏԻՄ ընտրություններին. նախընտրական իրավիճակի գնահատում» թեմայով քննարկման ընթացքում «Մեդիա կենտրոնում» իշխանության և ընդդիմության ներկայացուցիչները քննարկեցին այն հարցը, թե ինչու են ՏԻՄ ընտրություններում առաջադրվել միայն իշխող կուսակցության ներկայացուցիչները, կամ դրան հարող թեկնածուներ: Ընդդիմությունից հատուկենտ թեկնածուներ կան:
ՀՀԿ կուսակցության անդամ Լեռնիկ Ալեքսանյանը նշեց, թե ՀՀԿ-ն մեծ կարևորություն է տվել ՏԻՄ ընտրություններին այն ժամանակ, երբ դեռ իշխանություն էլ չէր. «Դեռևս այն ժամանակ, երբ իշխանություն էլ չէ, ՀՀԿ-ն մարզերում 30-40 մարդ ուներ, ուներ գործող գրասենյակ»:
«Ժառանգություն» կուսակցության վարչության անդամ Սուսաննա Մուրադյանը ընդդիմության ցածր ներկայացվածությունը ՏԻՄ ընտրություններում պատճառաբանեց մի քանի հանգամանքներով. « ՀՀԿ-ն համայնքներում ունի գրասենյակներ, այդ պատճառով էլ կարողանում է կազմակերպել ընտրություններին մասնակցությունը: Իշխանությունն ունի ֆինանսական անսահմանափակ միջոցներ, հնարավորություններ պահել գրասենյակներ, շտաբներ համայնքներում, ինչը չես ասի ընդդիմադիր կուսակցությունների մասին»:
Տիկին Մուրադյանը նկատեց, թե իշխանությունը ՏԻՄ ընտրությունները դիտարկում է որպես վերարտադրվելու հիմք: Այնուհետև մտահոգություն հայտնեց, թե համայնքներում ուղղակի «երկնքից են փրկություն սպասում այս իշխանություններից ազատվելու համար»: Ու պատմեց, թե ինչպես է սահմանամերձ գյուղերի գյուղապետերից մեկը դժգոհել ՀՀԿ-ին` լինելով ՀՀԿ-ական ու նշեց, թե «ՀՀԿ-ն երկիրը քանդեց»: Նաև պատմել են , թե ինչպես են իրենց մարզպետները ստիպել դառնալ ՀՀԿ-ական:
Կարդացեք նաև
Լեռնիկ Ալեքսանյանը հակադարձեց, թե «ՏԻՄ ընտրություններում ֆինանսական մեծ պահանջներ չկան»:
Սուսաննա Մուրադյանի կարծիքով` ՏԻՄ ընտրություններում իշխանություններն ունեն իրենց նախընտրելի թեկնածուն, իսկ մյուսների առաջադրումը ուղղակի ձևական բնույթ է կրում «եվրոպաներին ու դիտորդներին համոզելու համար, որ ժողովրդավարական ընտրություններ են անցկացնում»:
Տիկին Մուրադյանը ամփոփեց. «Ընտրություն կոչվող տրագիկոմեդիան իշխանությունները կազմակերպում են հիանալի և համաշխարհային աստղերի հետ անգամ կարող են համեմատվել»:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
