Այսօր ԱԺ մարդու իրավունքների պաշտպանության հարցերի հանձնաժողովում քննարկվեց «Կուսակցությունների մասին» օրենքում փոփոխությունների նախագիծը, որը ներկայացրել են ՀՀԿ եւ ՀՅԴ պատգամավորները:
Նախագծով, մասնավորապես, առաջարկվում է կուսակցությունների գույքի կառավարման հետ կապված փոփոխություններ անել: Ընդ որում, առաջարկվում էր, որ օրինագիծը քննարկվի 24-ժամյա ռեժիմով:
Հանձնաժողովի նախագահ Էլինար Վարդանյանին հետաքրքրում էր՝ ինչո՞ւ է այս հարցը բերվել հապճեպ, այդքան շտապ, ո՞րն է այն հիմքը, որը ստիպում է հարցը քննարկել արագացված ռեժիմով:
Ալեքսանդր Արզումանյանին այդ շտապողականությունը նույնպես կասկածելի էր թվում ՝ ինչո՞ւ են շտապում, ինչու՞ է ամեն անգամ ինչ-որ օրենք բերվում ու պարտադրվում, որ այն շտապ, 24-ժամյա ռեժիմում քննարկվի ու ընդունվի: Նախագծի համահեղինակ, ՀՅԴ պատգամավոր Արծվիկ Մինասյանը բացատրեց, որ ուզում են, որ փոփոխություններն ընդունվեն մինչեւ Ազգային Ժողովի ամառային արձակուրդները:
Կարդացեք նաև
Աղվան Վարդանյանի խոսքերով՝ «Կարող է ամռան ընթացքում ինչ-որ մեկն ուզում է գույք նվիրաբերել ինչ-որ կուսակցության»: Ըստ նրա, որեւէ խնդիր չկա, երբ ուզում են արագ ռեժիմով քննարկել: Կուսակցությունները նաեւ մարզերում, ունեն ձեռք բերված գույք, որը տնօրինում են տարիներով, բայց իրավական առումով չեն կարողանում դրանք սեփականաշնորհել:
Բացատրությունները Ալեքսանդր Արզումանյանին չհամոզեցին:
Հանձնաժողովի նախագահ Էլինար Վարդանյանը հիշեց ժողովրդական խոսքը՝ «ամեն ինչ լավ է, բայց ուզում եմ հասկանամ ` որտե՞ղ են ուզում մեզ «քցեն»:
Արծվիկ Մինասյանը վստահեցրեց, որ որեւէ մեկին «քցելու», խաբելու խնդիր նախագիծը չի հետապնդում, պարզապես ամառային արձակուրդների խնդիրը կա. «Այս փոփոխությունների կարևորությունը նրանում է, որ սա հնարավորություն է, որ կուսակցություններն ի վերջո օրինականացնեն իրենց կողմից տնօրինվող գույքը»:
ՕԵԿ պատգամավոր Մհեր Շահգելդյանի դիտարկմամբ՝ պետք է փոփոխության ենթարկվի կուսակցական ամբողջ համակարգը, իսկ այսպես հատվածական մոտեցումներին դեմ են:
Ալեքսանդր Արզումանյանը հարցրեց. «Երկու տարի է ՀԿ-ների մասին օրենքը չենք կարողանում բերել ավարտին, իսկ սա ինչո՞ւ պետք է շտապենք: Որովհետև կա մի կուսակցություն, որ ուզում է գույքը սեփականաշնորհի՞»:
Նախագծի հեղինակները հորդորեցին ամեն ինչին սեւ ակնոցներով չնայել: Ի վերջո նախագիծը ստացավ բացասական եզրակացություն:
Հռիփսիմե ՋԵԲԵՋՅԱՆ
