Այսօր ԱԺ պետա-իրավական հարցերի հանձնաժողովում քննարկվեց կառավարության ներկայացրած նախագիծը, որով առաջարկվում է «ՀՀ քաղաքացու անձնագրի մասին օրենքում» փոփոխություններ եւ լրացումներ կատարել:
Փոխոստիկանապետ Վարդան Եղիազարյանն ասաց, որ առաջարկվող փոփոխությամբ նպատակ ունեն հստակեցնել անձնագիր կամ նույնականացման քարտ ստանալու համար ներկայացվող փաստաթղթերի ցանկը: Օրինակ, առաջարկվում է լրացում կատարել, ըստ որի, ՀՀ կառավարության որոշմամբ սահմանված դեպքերում եւ կարգով քաղաքացին իրավունք կունենա անձնագիր կամ նույնականացման քարտ ստանալու (փոխանակելու) համար լուսանկարվել եւ մատնադրոշմներ հանձնել նաեւ իր գտնվելու վայրում՝ առանց ոստիկանության մարմին ներկայանալու: Սա հիմնականում նախատեսված է հաշմանդամություն ունեցող մարդկանց, հիվանդանոցային կամ տնային պայմաններում ծանր հիվանդությամբ տառապող, ինքնուրույն տեղաշարժվելու ունակությունը կորցրած, ազատազրկման վայրերում գտնվող քաղաքացիների համար:
Որոշակի կատեգորիայի քաղաքացիների համար համալրվել է անձնագիր եւ նույնականացման քարտ տրամադրելիս պահանջվող փաստաթղթերի ցանկը: Մասնավորապես, մինչեւ 16 տարեկան քաղաքացուն անձնագիր, ինչպես նաեւ անգործունակ ճանաչված քաղաքացուն անձնագիր կամ նույնականացման քարտ տրամադրելիս պահանջվելու է այլ օրինական ներկայացուցիչ հանդիսանալու փաստը հավաստող փաստաթուղթ, խնամակալ կամ հոգաբարձու հանդիսանալու փաստը հավաստող փաստաթուղթ:
Կարդացեք նաև
Էդմոն Մարուքյանը փոխոստիկանապետին ասաց. «Նույնականացման քարտերի հետ կապված ինձ մի քանի անգամ դիմել են, հիշո՞ւմ եք, մի խումբ քաղաքացիներ հրաժարվում էին վերցնել սոցիալական քարտերը, իրենց համար Սահմանադրական դատարանի որոշումից հետո այլընտրանքային տարբերակ պետք է լիներ: Ի՞նչ եղավ, այլընտրանքային հնարավորություն ունե՞ն»:
Փոխոստիկանապետը պատասխանեց. «Մեզ էլ են մի քանի անգամ դիմել: Հարցը լուծված է: Հիմա նույնականացման քարտը տրամադրելիս, եթե քաղաքացին դեմ է կոդավորմանը եւ նման խնդիր ունի, ապա համարը հանվում է քարտի վրայից: Էլ համարը չենք դնում»:
Հռիփսիմե ՋԵԲԵՋՅԱՆ
