Ապրիլի կեսին «Հայանտառ» ՊՈԱԿ-ի Իջեւանի անտառտնտեսության տնօրեն Արծրուն Ղալթախչյանն իր դիմումի համաձայն ազատվել է աշխատանքից: Անցած ավելի քան մեկուկես ամսում Իջեւանի անտառտնտեսության տնօրեն չի նշանակվել: Այդ անտառտնտեսության տնօրենի ժամանակավոր պաշտոնակատարն է անտառտնտեսության տնօրենի տեղակալ Արթուր Գաբրիելյանը: Իջեւանում տարածված լուրերի համաձայն ՝ բազմաթիվ անձինք են ակնկալում դառնալ անտառտնտեսության տնօրեն:
Նշենք, որ Իջեւանի անտառտնտեսությունում բացահատվել են ապօրինի մեծածավալ անտառհատումներ: ՀՀ ոստիկանության տարածած հաղորդագրության համաձայն՝ կազմակերպված հանցագործությունների դեմ պայքարի գլխավոր վարչություն դիմած Տավուշի մարզի բնակիչ Սամվել Ստեփանյանը ոստիկաններին հայտնել է, որ ինքը 2014թ. ընթացքում առնվազն 4 անգամ մեծ ծավալի ապօրինի անտառհատումներ է կատարել Իջեւանի անտառտնտեսության Խաչարձանի անտառպետության տարածքում եւ ամեն անգամ փայտանյութը անտառից «Ուրալ» մեքենայով տեղափոխելու համար, որպես կաշառք, խոշոր չափի գումարներ է տվել Խաչարձանի անտառպետության պետ Գիգուշ Դավթյանին: Նախապատրաստված նյութերն ուղարկվել են ՀՀ քննչական կոմիտեի Տավուշի բաժին: Այնտեղ ապրիլի 2-ին քրեական գործ է հարուցվել ՀՀ քրեական օրենսգրքի 179 հոդվածի 1-ին մասով («Յուրացնելը կամ վատնելը»), 296 հոդվածի 1-ին մասով («Ծառերի, թփերի եւ բուսածածկի ապօրինի հատումը»), 311 հոդվածի 3-րդ մասի 3-րդ կետով («Խոշոր չափերով կաշառք ստանալը» ) եւ 312 հոդվածի 2-րդ մասով («Խոշոր չափերով կաշառք տալը»):
Ապօրինի կերպով ծառեր հատած եւ խոշոր չափերով կաշառք տված Սամվել Ստեփանյանը վերջին 2 հոդվածներով ներգրավվել է որպես մեղադրյալ :
Ոսկան ՍԱՐԳՍՅԱՆ
Հետաքրքիր է, Սամվել Ստեփանյանը որքան է ցանկացել քրեական պատասխանատվության ենթարկվել, որ իր կողմից կատարված անօրինականությունների մասին մանրամասն տեղեկացրել է Ոստիկանությանը: Առավել ախմախ և անկապ հայտարարություն երևի թե չի հնչել: Միգուցե ժամանակն է ազնվորեն ասել, որ մարզի դատախազ Տ.Սարգսյանի և Տավուշի մարզպետ Հ.Աբովյանի կողմից նախաձառնած ”բանբասանք” օպերացիան, համաձայն որի Ս.Ստեփանյանը հանդիսանում էր իրենց նպատակներն ի կատար ածելու ամենահզոր միջոցը, դուրս եկավ հսկողությունից ու միջոցը ներգրավվեց որպես մեղադրյալ /արժանին պետք է մատուցել քննչականի պետ Ա.Մանթաշյանին, մարզպետի և դատախազի կողմից թելադրված խաղի կանոններն անտեսելու համար/:
Այս ամենից զատ, Իջևանում տարածված լուրերի համաձայն, հիշատակված օրինախախտման մասին Ոստիկանությունն իմացել է ավելի ուշ, իսկ մինչ այդ, Ս.Ստեփանյանին և այլոց կազմակերպված հրավիրել են Տավուշ մարզպետի մոտ, իսկ հետո մարզի դատախազի աշխատասենյակ ու կողմնորոշելով համոզել, որպեսզի նրանք համապատասխան բողոք ներկայացնեն ՀՀ Գլխավոր դատախազին: Թե ինչ է կատարվել հետո, հարգարժան լրագրողը մանրամասն նշել է: