Վերջին օրերին թատերարվեստին առնչվող կուլիսային խոսակցությունների կիզակետում է հայտնվել ճանաչված դերասան, ռեժիսոր, ՀՀ արվեստի վաստակավոր գործիչ, Ազգային օպերային թատրոնի ռեժիսորական ղեկավարման պատասխանատու Վիգեն Ստեփանյանի ղեկավարությամբ Բրյուսելում հայկական թատերախումբ հիմնելու մասին լուրը: Թատերարվեստի մարդիկ տարակուսում են, թե իրենց կոլեգան ինչպես է համատեղելու աշխատանքն այստեղ եւ արտերկրում:
Չհերքելով լուրը՝ Վիգեն Ստեփանյանը «Առավոտին» հայտնեց հետեւյալը. «Բելգիայում թատերախումբ հիմնելու գաղափարն ինձ առաջարկեց Բրյուսելի հայ մշակութային «Հայ տուն» կենտրոնի ակտիվ անդամներից Սոնա Պետրոսյանը: Մայիսի 24-ին կայացավ հայտարարված ունկնդրումը, ընտրեցինք հայազգի շուրջ 20 արտիստների, որոնց մեջ կան մասնագիտությամբ ռեժիսորներ եւ դերասաններ»,- ասաց արվեստագետը: Նա հավելեց. «Նույնիսկ ծիծաղելի են պտտվող խոսակցությունները: Չէ՞ որ աշխարհում վաղուց գործում է հրավիրյալ գեղարվեստական ղեկավարների, ռեժիսորների, դիրիժորների ինստիտուտը, մանավանդ որ չգիտեմ, թե որն է Օպերային թատրոնում իմ պաշտոնի իմաստը. ռեժիսորները չեն կառավարում, եւ իրե՛նց էլ չեն կառավարում»:
ՍԱՄՎԵԼ ԴԱՆԻԵԼՅԱՆ
Վիգեն Ստեփանյանի հետ հարցազրույցի մանրամասները կարդացեք
«Առավոտ» օրաթերթ
04.06.2015
