ԱԺ փոխնախագահ Էդուարդ Շարմազանովի դիտարկմամբ, Ադրբեջանն ամեն կերպ ցանկանում է Թուրքիային ներգրավել Լեռնային Ղարաբաղի հակամարտության կարգավորման գործընթացում, բայց Թուրքիան այդտեղ որևէ անելիք չունի:
«Սա առաջին անգամը չէ, որ Ադրբեջանը հանդես է եկել նման առաջարկով: Սակայն պետք է նախ ասեմ, որ բանակցային գործընթացը պատվերով համերգ չէ, որ Ադրբեջանը երբ ուզենա նման առաջարկներ անի: Երկրորդը, ինչը ես շատ եմ կարևորում, այն է, որ ԵԱՀԿ Մինսկի խմբի համանախագահ երկրների ղեկավարները մեկ անգամ չէ, որ հայտարարել են, որ Մինսկի խմբի եռանախագահողների գործող ձևաչափն ամենաօպտիմալն է»,- անդրադառնալով ԵԱՀԿ նախագահ Իվիցա Դաչիչի այն հայտարարությանը, թե Ադրբեջանն առաջարկել է ընդլայնել ԵԱՀԿ Մինսկի խմբի համանախագահ երկրների կազմը, ասաց ԱԺ փոխնախագահ Էդուարդ Շարմազանովը:
Պարոն Շարմազանովի խոսքով, ակնհայտ է՝ ուր են տանում Ադրբեջանի ձգտումները՝ Թուրքիային խցկել Լեռնային Ղարաբաղի հակամարտության կարգավորման գործընթացում. «Ինչն անհնար է: Թուրքիան բանակցային գործընթացում որևէ անելիք չունի և չի էլ կարող ունենալ»:
Անդրադառնալով Թուրքիայի նախագահի հայտարարությանը, թե Թուրքիայի գլխավոր թշնամիները հայկական լոբբին, համասեռամոլները և լրագրողներն են՝ պարոն Շարմազանովը շարունակեց. «Թուրքիայի նախագահ Ռեջեփ Թայիփ Էրդողանի հերթական հակահայկական հայտարարությունը ցույց է տալիս նրա իրական քաղաքական դեմքը, նրա հակահայկական լինելը և այն, որ Թուրքիայի քաղաքական վերնախավը հեռու է ժողովրդավարական լինելուց: Դա ցույց է տալիս, որ Թուրքիայի քաղաքական վերնախավն ապրում է բարդույթներով, որը կոչվում է հայկական բարդույթ: Իհարկե, սա նոր բան չէ: Ափսոսում եմ, որ այդպես է, սակայն, փաստ է»:
Կարդացեք նաև
Արփինե ՍԻՄՈՆՅԱՆ
