«Այս դեպքում քրեական գործերը հարցի լուծումներ չեն»,- հունիսի 4-ին լրագրողների հետ հանդիպման ընթացքում, անդրադառնալով էլեկտրաէներգիայի սակագնի բարձրացմանը, ասաց տնտեսագետ Վարդան Բոստանջյանը:
Նա նշեց, որ էներգահամակարգը չափազանց բարդ ինժեներական համակարգ է: Այդ համակարգն ամբողջ աշխարհում պահանջում է հետեւողական արդիականացում եւ շահագործման պայմանների բարելավում, ինչը տեղի չի ունեցել. «Բայց մենք, լինելով պատգամավորներ, բազմիցս արտաքին պարտք կազմող ինստիտուտներով գումարներ ենք ուղարկել այդ նպատակի համար: Այդ գումարները նպատակի համար չեն ծառայել, բնականաբար, այդ համակարգները գտնվում են ողորմելի, խեղճ վիճակում»:
Ըստ նրա՝ Հայաստանն այլընտրանք չունի, պետք է արդիականացնել համակարգը. «Բայց պետք է պատասխանատվության ինստիտուտ սահմանվի, ո՞ւր են այդ փողերը: Գրեթե 250-300 միլիոն դոլարին համապատասխանող գումար հօդս է ցնդել: Տարբեր խոսակցություններ կան. Մեկը սուր հայացքով ասում է՝ որոշակիորեն կթանկանա, իբր թե մեծ լավություն՝ 17 դրամ չէ, բայց 16 դրամ կլինի, ինչքան հետաքրքիր է, այսպիսի դրախտային վիճակում ոչ մի երկիր չի ապրում: Մյուսն ասում է՝ հիմնավորված է, ես էլ եմ հասկանում, որ հիմնավորված է, բայց ո՞վ է մեղավոր, որ այդպես է»:
Կարդացեք նաև
ԱԺ պատգամավոր Լեռնիկ Ալեքսանյանը նշեց, որ «Հանրապետական» խմբակցությունը փակ նիստ է գումարել, որպեսզի պատգամավորները խնդրի մասին լիարժեք պատկերացում կազմեն. «Երկու-երեք խնդիրներ կային, որոնք ե՛ւ նախարարին, ե՛ւ Նազարյանին, ե՛ւ պատգամավորներին մտահոգում էին, որ եղած գումարները նպատակային չեն օգտագործվել: Երեկ Արարատի մարզում ես մի դեպքի ականատես եղա՝ հոսանքազրկվեց, եւ եթե քամի է լինում հոսանքազրկվում է, եւ 1 օր է պետք, որ ման գան, չարչարվեն եւ վերականգնեն»:
Նա ասաց, որ Հանրային ծառայությունները կարգավորող հանձնաժողովի առջեւ խնդիր է դրվել օբյեկտիվ գնահատականներ տալ, եւ հանել այն ծախսերը, որոնք առաջնային չեն. «Ռոբերտ Նազարյանից որպես կուսակցություն մենք պահանջեցինք ծախսերը, որոնք տեխնիկական վերազինման հետ կապ չունեն, հանել ցանկից: Այստեղ խնդիրը էներգահամակարգի վիճակի մասին է, եւ որ գումարը նպատակային օգտագործվի: Հանձնաժողովի համար մեկ խնդիրը դա է՝ այդ գումարները արդյունավետ են օգտագործվե՞լ, թե՞ ոչ»:
Ամի ՉԻՉԱԿՅԱՆ
