Ռեժիմը, հերթական անգամ բացահայտելով իր բանտապետական էությունը, Հիմնադիր խորհրդարանի նախագահ Գարեգին Չուգասզյանին թույլ չի տվել Ինտերնետի կառավարման ամենամյա «Եվրոդիգ 2015» համաեվրոպական հեղինակավոր համաժողովին մասնակցելու նպատակով մեկնել Բուլղարիա և ներկայացնելու Հայաստանը:
Գ. Չուգասզյանը, հաշվի առնելով այն հանգամանքը, որ զանգվածային անկարգությունների նախապատրաստման վերաբերյալ շինծու քրեական գործով իր նկատմամբ որպես խափանման միջոց է ընտրված չբացակայելու մասին ստորագրությունը, պատշաճ կերպով պահպանել է երևույթի ձևական-իրական առումը և հրավերն ստանալուն պես դիմել է այսպես կոչված իրավապահպան մարմիններին՝ հանրապետությունից բացակայելու թույլտվություն ստանալու համար:
Տասն օրվա ընթացքում «իրավապահ մարմիններից» հարցի լուծման վերաբերյալ պատասխան չի ստացվել, մինչդեռ նրանք պարտավոր են նման դեպքերում կամ բավարարել դիմումը կամ մերժել այն պատճառաբանված որոշմամբ: Բազմաթիվ նախադեպեր կան, երբ նշված խափանման միջոցի պայմաններում քաղաքացուն թույլատրվել է բացակայել հանրապետությունից:
Գ.Չուգասզյանին ելքի, իսկ դրանից առաջ՝ «Հայկական վերածնունդ» համահայկական կազմակերպության Փարիզի մասնաճյուղի համակարգող Շանթ Ոսկերչյանին մուտքի, թույլտվություն չտալու դեպքերը ապացուցում են, որ Հայաստանում վերականգնվել և տխրահռչակ ստալինյան մեթոդներով, այն է՝ օրենքը արհամարհելով ու ոտնահարելով, կիրառվում են այսպես կոչված «սև ցուցակները»:
Կարդացեք նաև
Միևնույն ժամանակ՝ հանցավոր ռեժիմը իրեն հայտնի հնամաշ մեթոդներով ներկայիս աշխարհում չի կարող արդյունքի հասնել: Գ.Չուգասզյանը համաժողովին կմասնակցի և Հայաստանը կներկայացնի ու զեկուցումով հանդես կգա հեռավար կապի միջոցով:
Գ.Չուգասզյանի նկատմամբ արգելքը և նման եղանակով նրա մասնակցությունը ևս մեկ անգամ ցույց կտան, որ հատկապես բարձր տեխնոլոգիաների դարում գաղափարական, տնտեսական և սոցիալական առումներով հետամնաց ու սնանկ բանտապետությունը ոչ միայն չի կարողանում արգելել կյանքի ընթացքը, այլև յուրաքանչյուր այսպիսի ջղաձգմամբ իր գոյության ռեսուրսը զրոյացնում է նաև արտաքին աշխարհում:
Հիմնադիր խորհրդարանի քարտուղարության հաղորդագրություն
