«Ամերիկայի Ձայն». Ամերիկայի Միացյալ Նահանգների Կոնգրեսի արտաքին հատկացումների ենթահանձնաժողովում սկսվել է ԱՄՆ-ի արտաքին օգնության բյուջեի քննարկումը:
Հայաստանին ԱՄՆ-ի վարչակազմը նախատեսում է շուրջ 18 միլիոն դոլարի օգնություն ուղղել տնտեսական զարգացման, 1.71 միլիոն՝ թմրանյութերի շրջանառության վերահսկման և շուրջ 2.3 միլիոն դոլար՝ Զինված ուժերի վերապատրաստման համար:
Չնայած ռուս – ուկրաինական հակամարտությունից հետո ստեղծված նոր իրավիճակին, Ամերիկայի հայկական կազմակերպությունները շարունակում են պայքարել Հայաստանին ամերիկյան հատկացումների չափի առավել ավելացման համար:
Վերլուծաբանների կարծիքով, Ռուսաստանի կողմից ստեղծված Եվրասիական միությանն անդամակցելով Հայաստանը կարող է կորցնել հետաքրքրությունն Արևմուտքի համար:
Կարդացեք նաև
«Ցավալի է, սակայն Հայաստանը ճանապարհի կեսից լքելով Եվրամիության հետ ինտենսիվ բանակցությունները և շրջվելով դեպի Եվրասիական միություն, որից տնտեսական առումով որևէ օգուտ չի ստացել, կորցնում է հետաքրքրությունը», – նշել է Քարնեգի հաստատության Ռուսաստանի և Եվրասիայի ծրագրերի ղեկավար Թոմ դը Վաալը:
Վերլուծաբանը հիշեցրել է, որ Եվրասիական միության անդամ դառնալուց հետո Հայաստանի ու Ռուսաստանի միջև առևտրատնտեսական շրջանառությունը լրջորեն նվազել է:
Նշենք, որ մի շարք կոնգրեսականներ, այդ թվում՝ Ադամ Շիֆը և Ռոբերտ Դոլդը, հայտարարել էին, որ պայքարելու են Միացյալ Նահանգների կողմից Հայաստանին տրամադրվող օգնության ավելացման համար:
