Ցորենի, վարսակի, եգիպտացորենի կամ նուշի թեփը շատերը օրգանիզմը մաքրելու, վերականգնելու համար օգտագործում են իրենց սննդակարգում, բայց քչերը գիտեն, որ այդ թեփից կարելի է նաեւ լոգանքներ ընդունել: Թեփից լոգանքը հանգստացնում է բորբոքված մաշկը, փափկեցնում կոշտ մաշկը եւ վերացնում քորը:
Մաշկի վրա հաճելի բույր եւ թարմացնող ազդեցություն ստանալու համար օգտագործեք հետեւյալ դեղաբույսերի խառնուրդով լոգանքներ` անանուխ, մեղվախոտ, հազրեվարդ, ուրց, գիհի:
Արյան շրջանառությունը լավացնող եւ եթերային յուղերով հարուստ դեղաբույսերից՝ անանուխից, մեղվախոտից եւ հազրեվարդից բացի, առանձնանում են նաեւ նարդոսը, երիցուկը, եղեսպակը, լորենու ծաղիկը եւ հազարաթերթիկը: Սրանք ունեն նաեւ հականեխիչ ազդեցություն:
Լորենու ծաղիկներից լոգանքները ուժեղացնում են քրտնարտադրությունը, հանգստացնում նյարդային համակարգը: Խորհուրդ է տրվում լորենու ծաղիկներով լոգանք ընդունել նաեւ անքնության դեպքում:
Իսկ հանքային աղերով հարուստ դեղաբույսերից են եղինջը, սամիթը, կեչին, երիցուկը, կաթնուկը, նարգիզը, որոնք մաշկը ապահովում են կարեւոր տարրերով, կարգավորում մաշկի ջրային հաշվեկշիռը եւ պաշտպանում ջրազրկումից:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
03.06.2015
