«Ինձ այսօր չի բավարարում գիդերի աշխատանքը, նրանց պատրաստվածությունը պետք է այլ լինի, նրանց հայրենասիրությունը պետք է այլ լինի, նրանք երկիրը պետք է շատ սիրեն: Պետք է երկիրը սիրող ու ճանաչող նվիրյալներ աշխատեն»,- այսօր «Հենարան» ակումբում այսպիսի կարծիք հայտնեց Տուրիզմի հայկական ինստիտուտի ռեկտոր Ռոբերտ Մինասյանը՝ պատասխանելով Aravot.am-ի այն հարցին՝ ի՞նչ կարծիք ունի հայ էքսկուրսավարների աշխատանքի մասին, արդյո՞ք ճիշտ են ներկայացնում Հայաստանը, մեր մշակույթն ու հայկական խոհանոցը օտարերկրյա զբոսաշրջիկներին :
Պարոն Մինասյանն ասաց, որ չի կարելի ոչ մասնագետ մարդկանց ներգրավել գիդերի աշխատանքում. «Չի կարելի՝ ով ասես աշխատի գիդ: Ես ասում եմ՝ լիցենզիա է պետք, ասում են՝ չի կարելի, բայց սերտիֆիկատ կարելի է, չէ՞»:
Պարոն Մինասյանը բերեց Իսրայելի օրինակը, որտեղ գիդ աշխատելու համար պետք է 2 տարի ստացիոնար սովորեն, շաբաթը 2 անգամ դասընթացի մասնակցեն, քննություն հանձնեն, ուսման համար վճարեն 5000 դոլար. «Իսկ քննությունը պիտի հանձնեն գրավոր, հետո դիմեն տուրիզմի նախարարություն ու բանավոր քննություն հանձնեն, հետո սերտիֆիկատ ստանան: Առանց սերտիֆիկատների էքսկուրսիաների չեն կարող մասնակցել»:
Պարոն Մինասյանն ասաց, որ Հայաստանը պետք է նորովի ներկայացվի աշխարհին, նոր մոտեցումներ են պետք, եւ որպես նոր մոտեցում Մինասյանն առաջարկում է շրջանառության մեջ դնել հետեւյալ գաղափարը. «Նոյը եղել է առաջին տուրիստը, որը եկել է Հայաստան, իսկ Աստվածը՝ առաջին տուրօպերատորը: Աստված նրան ասել է՝ քեզ հետ վերցրու այսինչ բաները, հագուստ եւ այլն ու գնա Հայաստան»:
Կարդացեք նաև
Aravot.am-ի այն հարցին՝ Քիմ Քարդաշյանի այցը Հայաստան, արդյոք նոր մոտեցո՞ւմ չէր Հայաստանը ճանաչելի դարձնելու համար, եւ արդյոք պե՞տք է սպասել, որ Քիմի երկրպագուների մեծ բանակ կգա Հայաստան, պարոն Մինասյանի պատասխանը՝ տեսանյութում:
Նելլի ԲԱԲԱՅԱՆ
