«Իրազեկ և պաշտպանված սպառող» ՀԿ նախագահ Բաբկեն Պիպոյանի համոզմամբ՝ ՀԷՑ-ի կուտակած պարտքերը վատ կառավարման մասին են խոսում:
«Ունենք կառավարիչ, որը ձախողում է, ՀԷՑ-ը անցած տարի թանկացման հայտ ներկայացրեց՝ հիմնավորելով, որ այլեւս չի լինի թանկացում… 32 միլիոն դոլար շահույթ հետապնդող ընկերությունը իր աշխատողներին բարեգործություն է արել սպառողների հաշվին: Այդ բարեգործությունները համարել է ծախս ու գրել սպառողների հաշվին: Ենթադրենք՝ ծախսեր կան, երկու անձ, երբ պայմանագիր են կնքում, ունեն պարտավորություններ, որոնք պետք է կատարեն: Եթե շահագրգիռ ենք՝ թանկացում չլինի, պետք է հասկանանք, ՀԷՑ-ը իր պարտավորությունները կատարե՞լ է, թե՞ ոչ: Ասում են՝ հենասյուներ են փոխել, բայց արդյոք փոխե՞լ են: Այն ներդրումները, որոնք իբր անցած տարի արել են, արդյոք արվե՞լ են: Ստուգումներ եթե լինեն, կպարզենք՝ ինչ չարաշահումներ են արվել իրականում»:
Շահագործման աղյուսակը ուսումնասիրելիս Բաբկեն Պիպոյանը աբսուրդի հասնող թվեր է արձանագրել.«Ցեմենտից սկսած մինչեւ ձեռնոցների գները: 1 կգ ցեմենտի գինը 57.000 դրամ… ՀԷՑ-ը ձախողում է կառավարումը, եթե սակագինը բարձրանա, էլի ձախողելու են, իսկ հաջորդ տարի ունենալու ենք էլէներգիայի թանկացման հերթական հայտը»:
Փորձագետի խոսքով՝ հանրային ծառայությունները կարգավորող հանձնաժողովի նախագահ Ռոբերտ Նազարյանի երեկվա հայտարությունը, որ սակագնի աճը անխուսափելի է լինելու, ցույց է տալիս հանձնաժողովի դիրքորոշումը. «Մտահոգությունը, որ հանձնաժողովը ներկայացնում է, բառից այն կողմ չի անցնում: Ձեւականորեն են գիտակցում, հոգեվիճակ չունեն»:
Կարդացեք նաև
Ասուլիսի վերջում էլ պարոն Պիպոյանը թանկացման դեմ պայքարի իր սցենարը ներկայացրեց: Ըստ նրա, պահանջները պետք է լինեն հստակ ու հիմնավորված, թե ինչու չպետք է թանկանա: Ինչից հետո հարցը պետք է տեղափոխել հանրային կառավարման դաշտ ու ներգրավել բոլոր քաղաքական ուժերին, բայց հանրային բողոքը պահել ապաքաղաքական:
Արփինե ՍԻՄՈՆՅԱՆ
