ԱԺ-ում քիչ առաջ 2014-ի բյուջեի կատարման հաշվետվության ներկայացման ժամանակ ՀՀԿ պատգամավոր Վարդան Այվազյանն ու Ֆինանսների նախարար Գագիկ Խաչատրյանն իրար հետ վիճեցին եւ կրքերն ԱԺ-ում այնքան թեժացան, որ միջամտեցին ԲՀԿ-ականները՝ հորդորելով հանդարտվել:
Վարդան Այվազյանը հարկային-մաքսային մասի հաշվետվության ժամանակ հետաքրքրվեց, թե, օրինակ, շենքերի կառուցման համար ինչո՞ւ են արտաբյուջեից ծախսում, բյուջեում թող ամրագրեն, ծախսեն: Հետո այն ինչո՞ւ է առանձին բերվում ԱԺ՝ բյուջեից առանձնացված:
Ֆինանսների փոխնախարար Արմեն Ալավերդյանը պատասխանեց, որ արտաբյուջետային հաշիվների առաջին կիրառումը ՀՀ-ում արել են հարկային մարմինները, հետո՝ մաքսային, ոստիկանություն եւ այլն. «Օրենսդրությունը հնարավորություն է տվել, որ կառավարությունը պետք է նախահաշիվներով հաստատի արտաբյուջեները: Հաշիվները հաստատվում են եւ քանի որ դա 100 տոկոսանոց թիվ չի, դրվում է եկամտային ինչ-որ մեծություն: Կառավարությունը հաստատում է այն ցուցանիշը, որը հաստատվում է, տարեվերջին ճշգրտվում է՝ այդ եկամուտը եղավ, թե չէ: Մեր արտաբյուջետային միջոցների մասին կայքում տեղադրվում է, պարզապես պետք է մի քիչ թափանցիկություն ապահովի, որ հանրությունն իմանա:
Վարդան Այվազյանն էլ ասաց. «Ի՞նչ կա, եթե պետք է, օրենսդրությունը փոխենք: Ի՞նչ խնդիր կա, եթե նախահաշվով գրվում է: Ռացիոնալ աշխատանք իրականացնելու համար եթե մենք օրենքում փոփոխություն անենք, դուք կողմ կլինե՞ք»:
Կարդացեք նաև
Արմեն Ալավերդյանն ասաց, որ պետք է քննարկեն այդ հարցը. «Կառավարությունը նախահաշիվը քննարկում է, հավանություն է տալիս կամ չի տալիս: Այնպես չի, որ մեր բոյւջետային դասակարգման ծախսերից դա տարբերվում է: Եկամուտները կարող են առաջանալ, կարող են չառաջանալ: Բայց տարվա վերջում դա 100 տոկոսով մտնում է բյուջեի եկամուտների ու ծախսերի մեջ»:
Իսկ երբ գլխավոր գանձապետ Ատոմ Ջանջուղազյանը սկսեց բացատրել, թե ինչ են անում արտաբյուջետային միջոցների հաշվին՝ Վարդան Այվազյանն ասաց. «Դե կներեք, էլի, մենք հիմա ամբողջ երկրով գնում ենք ծրագրային բյուջետավորմանը: Ծրագրային բյուջետավորման գործընթացն ինքնըստինքյան բացառելու է արտաբյուջետայինի հետ կապված: Հիմա տույժ-տուգանքներ չե՞ն գնալու բյուջե»:
Արմեն Ալավերդյանի բացատրելով՝ «Հիմա մենք պետք է այսքան շենք կառուցենք, նախահաշիվը կազմվում է, կկառուցենք շենքն այնքան, որքանով մեր արտաբյուջետային միջոցները կբավականացնեն: Չենք ապահովի՝ շենքի կառուցումը հա կհետաձգվի: Բյուջեի մեջ շենքը չկա, եղավ միջոց՝ կկառուցվի, չեղավ՝ չի կառուցվի»:
Վարդան Այվազյանն էլ արձագանքեց, թե՝ «Ավելի լավ է չխորանանք»: Սա լսելուն պես Գագիկ Խաչատրյանը միջամտեց. «Պետք ա՝ խորանանք, պարոն Այվազյան, հիմա դրա ժամանակը չի: Պետք ա՝ եկեք նայեք, տեսեք, եթե պետք ա, որ արտաբյուջեն ԱԺ-ն հաստատի՝ կհաստատենք»:
Այվազյանը սկսեց արդարանալ, որ նման ցանկություն չունի, իսկ Գագիկ Խաչատրյանը շարունակեց պետքը՝. «Չէ, եթե պետք ա խորանալ՝ խորացե՛ք: Բացատրում են, դուք էլի նույն հարցապնդումն անում եք: Հիմա ասում եմ՝ ինչքան պետք ա՝ խորացեք: Կլինի օրենսդրական փոփոխություն՝ փոխեք օրենքը, մենք վախենալու բան չունենք»:
Վարդան Այվազյանը կարկամեց Գագիկ Խաչատրյանի վրդովմունքից: Գագիկ Խաչատրյանը կրկնեց Ալավերդյանի ու Ջանջուղազյանի ասածը՝ եթե մեր արտաբյուջետային միջոցները բավարար չլինեն՝ շենքը չի սարքվի:
Միքայել Մելքումյանն ու Նաիրա Զոհրաբյանը, տեսնելով, որ կրքերը շատ են թեժացել, հորդորեցին դադարեցնել վեճը:
Նիստի ավարտին Վարդան Այվազյանը Գագիկ Խաչատրյանին սպասում էր դրսում:
Հռիփսիմե ՋԵԲԵՋՅԱՆ
