էլեկտրաէներգիայի սակագինը բարձրանալու է, բայց ինչ չափով՝ հարց է: Այդ մասին այսօր լրագրողների հետ զրույցում ասաց Հանրային ծառայություները կարգավորող հանձնաժողովի նախագահ Ռոբերտ Նազարյանը: Նա ասաց, որ ՀԷՑ-ի հայտը սահմանված կարգով նայել են, բայց չունեն որոշում. «Մենք մինչեւ 88 օր ուսումնասիրման ժամկետ ունենք, 1 շաբաթ հետո՝ ամսի 9-ին կամ 10-ին մեր դիրքորոշումը կհայտնենք»:
Թե որն է անձամբ Նազարյանի դիրքորոշումը՝ նա չհայտնեց. «Քանի որ աշխատակազմը դեռեւս չի ավարտել ուսումնասիրությունները որեւէ բան չեմ կարող ասել, բայց մի բան հաստատակամ ուզում եմ ասել: Բավականին մեծ հնչեղություն է ստացել մամուլում, որ ՀԷՑ-ն իր հայտում ունի այնպիսի հոդվածներ, որոնք վերաբերում են շքեղությանը՝ մեքենաներին, վարձակալած տներին եւ էլի այլ ծախսերին: Դրա համար այդ մասով կարող եմ ասել՝ եւ նախորդ սակագներում եւ առաջիկա սակագնում որեւէ շքեղության էլեմենտ սակագնում իր արտացոլումը չի գտնի: Ես պատրաստ չեմ պատասխանել՝ ինչքանով է բարձրանալու սակագինը: Կարող եմ ասել, որ սակագնում մի քանի բաղադրիչներ կան, որոնք ակնառու են դարձնում, որ սակագնի բարձրացում կլինի: Բայց ինչ չափով, ինչ մեծության՝ ես այսօր պատրաստ չեմ ասելու»:
Ռոբերտ Նազարյանն ասաց, որ սակագնի բարձրացման վրա ազդում է դոլար-դրամ փոխարժեքի տատանումը. «Սակագնի հաշվարկման հիմքում փոխարժեքը հաշվել էինք 407 դրամ, այսօր 480-481 է»:
Կարդացեք նաև
Հարցին՝ իսկ ժողովրդի վճարունակության բաղադրիչներն ուսումնասիրե՞լ եք, գիտե՞ք, որ ժողովուրդը վճարունակ չի՝ հանձնաժողովի նախագահը հորդորեց իր գործառույթներից հարցեր տալ:
Լրագրողները հիշեցրին՝ անցյալ տարի Դուք խոստացել էիք, որ սակագնի բարձրացում չի լինի, բայց…Ռոբերտ Նազարյանն արձագանքեց. «Ա՛յ, տեսնում եք, իմ տառապանքը փորձ ունի: Երբ անցյալ տարի դուք այդ հարցն ինձ տվեցիք, ես պատասխանեցի մի քանի նախադասությամբ: Դուք իմ պատասխանի մեջից առանձնացրեցիք մի նախադասությունը եւ այսօր շահարկում եք: Դրա համար ես այսօր զերծ կմնամ»:
Հռիփսիմե ՋԵԲԵՋՅԱՆ
