«Համակարգչային խաղերով մշտապես զբաղվելը երեխաներին կտրում է իրական աշխարհից,- ասում է մանկական հոգեբան Սոնա Մելիք-Քարամյանը.- երեխաները պիտի շփվեն ինչպես իրենց հասակակիցների, այնպես էլ մեծահասակների և, իհարկե, ընտանիքի անդամների հետ: Այդ դեպքում վիրտուալ աշխարհի համար քիչ տեղ ու ժամանակ կմնա, և էլ կարիք չի լինի անհանգստանալու համակարգչի ու համացանցի՝ երեխաների վրա թողած ազդեցության, դրանց վտանգավորության համար»:
Հոգեբանը, սակայն, խորհուրդ չի տալիս երեխաներին ամբողջովին արգելել համակարգչից ու համակարգչային խաղերից օգտվել. «Խաղերը, այդ թվում և համակարգչային խաղերը, նախապատրաստում են երեխային իր հետագա կյանքին: Եվ ճիշտ կլինի, որ ծնողներն էլ տիրապետեն այդ աշխարհին ու կարողանան այդ ամենը քննարկել երեխաների հետ: Ի վերջո, մեծերն են ձևավորում այն միջավայրը, որտեղ մեծանում ու դաստիարակվում են երեխաները»,- ընդգծեց հոգեբանը:
«Այսօրվա երեխաները միայն համակարգչային խաղերի անուններով կարող են գլուխ գովել»,- նկատեց ՀԳՄ մանկական գրականության սեկցիայի նախագահ, «Ծիծեռնակ» մանկական ամսագրի խմբագիր Անուշ Վարդանյանը:
Նա խորհուրդ է տալիս ծնողներին ամռան այս ամիսներին երեխաներին համակարգիչներից հեռացնել ու տանել մաքուր օդի. «Թող երեխաները ոչ թե համակարգչային, այլ բակային խաղեր խաղան, իսկ տանը լավ գրքեր կարդան»,- ասաց Ա. Վարդանյանը:
Սիրանուշ ՀԱՅՐԱՊԵՏՅԱՆ
