Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Գագիկ Պողոսյանի նախագահությամբ հունիսի 1-ին շարունակվում էր «Վերնիսաժի գործով» դատական նիստը:
Փաստաբան Վարդուհի Էլբակյանը դատական նիստի ընթացքում հայտարարեց, որ կողմը Ներսես Մելքոնյանի հանդեպ խափանման միջոցը գրավով փոխելու միջնորդություն է ներկայացրել, սակայն պաշտպանական կողմը խնդրում է այն չքննել: Նա հավելեց, որ այդ մասին խորհրդակցել է իր պաշտպանյալի հետ: Դատավորը որոշեց այլեւս քննության չառնել կողմի ներկայացրած այդ միջնորդությունը:
Գագիկ Պողոսյանը ներկայացրեց Առողջապահության նախարարությանը կից գործող Նուբարաշեն հոգեբուժական կենտրոնի դատահոգեբուժական փորձաքննության հանձնաժողովի գրությունը: Գրության մեջ ասված էր՝ հանձնաժողովի պարտականությունների մեջ չի մտնում գործի մեջ ներգրավված անձանց մասին տեղեկություններ ունենալը:
Մեղադրող Հարություն Սարգսյանը նկատեց, թե պարզ չէ, թե հանձնաժողովի վեց անդամներից ով ինչ մասնագիտացում ունի: Փաստաբան Երեմ Սարգսյանը հայտարարեց, որ իրեն ծանոթ է միայն Էլդա Գրինի անունը, որը հոգեբան է:
Կարդացեք նաև
«Այդ դեպքում ինչո՞ւ է ընտրվել հենց Էլդա Գրինը՝ իրականացնելու նշված գործողությունը: Կառաջարկեի հոգեբանական մասը հանձնարարել ոչ թե մեկ, այլ մի քանի հոգեբանների»,- առաջարկեց մեղադրողը:
Իսկ Երեմ Սարգսյանը նշեց, որ միջնորդություն ներկայացնելուց հատուկ չէր մատնանշել Էլդա Գրինին:
Դատարանը հոգեբանների մասնագիտացումը ճշտելու համար ընդմիջում հայտարարեց:
Ամի ՉԻՉԱԿՅԱՆ
