Քաղաքական հաշվեհարդարի գործը նոր որակներ է ձեռք բերում
Իջեւանում երեք տարի առաջ այդ ժամանակ դեռ նորընտիր քաղաքապետ, ԲՀԿ-ական Վարդան Ղալումյանի եւ Իջեւանի միջնակարգ երաժշտական դպրոցի տնօրեն, անկուսակցական Սվետլանա Բեգլարյանի միջեւ քաղաքական հայացքներով սկսված հաշվեհարդարի գործը նոր երանգներ է ստանում: «Առավոտն» այս գործին անդրադարձել է 2012 թվականի սեպտեմբերի 4-ի համարում՝ «Դու իմ թիմակիցը չես, քեզ պետք է ազատեմ աշխատանքից» հրապարակմամբ: Երաժշտական դպրոցի անկուսակցական տնօրեն Սվետլանա Բեգլարյանն այն ժամանակ քաղաքապետի ընտրություններում կոլեկտիվին չէր ներգրավել ԲՀԿ-ական թեկնածուի ընտրությանը, քանզի իր աշխատանքի տարիներին ինքը լավ հարաբերություններ էր ունեցել քաղաքի ՀՀԿ-ական իշխանությունների հետ: Քաղաքապետի պաշտոնում ընտրվելուց հետո Վարդան Ղալումյանը ջանք չէր խնայել, որպեսզի Սվետլանա Բեգլարյանն ազատվի զբաղեցրած պաշտոնից: Սվետլանա Բեգլարյանն էլ, սակայն, ձեռքերը ծալած չի նստել այս տարիների ընթացքում: Իրեն աշխատանքից ազատելու մասին Երաժշտական դպրոցի տնօրենների խորհրդի 2012 թվականի օգոստոսի 28-ի որոշումը բողոքարկել է: Առաջին ատյանի դատարանն անօրինական է ճանաչել տնօրենների խորհրդի որոշումը: Խորհրդի անդամներն առաջին ատյանի որոշումը բողոքարկել են վերաքննիչ դատարանում:
Դատարանն անփոփոխ է թողել առաջին ատյանի որոշումը: Հետո բողոքը հասել է իր տրամաբանական ավարտին` վճռաբեկ դատարան, որն անգամ վարույթ չի ընդունել գործը, քանի որ նոր հանգամանք ի հայտ գալու մասին որեւէ փաստարկ չի ներկայացվել: Այդպիսով ուժի մեջ է մտել առաջին ատյանի որոշումը` տնօրենների խորհրդի անօրինական որոշման մասին: Սույն թվականի փետրվարի 11-ի վճռով Սվետլանա Բեգլարյանն ուներ բոլոր իրավունքները նախկին աշխատանքին վերականգնվելու համար: Նա դիմել է խորհրդի անդամներին, քաղաքապետին: Դատարանի որոշումն անտեսվել է: Դե, նա էլ դիմել է դատական ակտերի հարկադիր կատարող մարմնին: Գործը դեռ ընթացքի մեջ է, մինչդեռ օրերս Սվետլանա Բեգլարյանը նոր ծանուցում է ստացել այն մասին, որ տնօրենների խորհրդի անդամները վերաքննիչ քաղաքացիական դատարան դիմում են ներկայացրել` վճռաբեկ դատարանի որոշումն անվավեր ճանաչելու մասին: Նիստը նշանակված է հունիսի 3-ին: Դատավոր Ալվարդ Հունանյանն էլ կքննի գործը: Թե ինչպե՞ս է վերաքննիչը գործը վարույթ ընդունել` անհասկանալի է: Սվետլանա Բեգլարյանը գրություն է ուղարկել դատավորին` տեղեկացնելով սույն գործով վճռաբեկի դիրքորոշման մասին ու ակնկալելով տեղեկանալ, թե ի՞նչ հիմքով է նոր վարույթ իրականացվելու: Սակայն պատասխան չկա:
Հուսանք, որ ամսի երեքին կայանալիք նիստի ժամանակ գոնե հիմնավորումները կհնչեն, այլապես ականատեսը կլինենք հերթական դատական աբսուրդի:
Կարդացեք նաև
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
30.05.2015
