Վարչական դատարանում մայիսի 29-ին դատավոր Կարեն Ավետիսյանի գլխավորությամբ շարունակվում էր քննվել ոստիկանության հայցն ընդդեմ Էդուարդ Մինասյանին եւ Էդուարդ Մինասյանի եւ նրա ներկայացուցիչների հակընդդեմ հայցը:
Էդուարդ Մինասյանի ներկայացուցիչ Ռոբերտ Ռեւազյանը հայտարարեց, որ կողմը դատարանից պահանջում է մերժել ոստիկանության հայցը եւ բավարարել իրենց հակընդդեմ հայցը:
Էդուարդ Մինասյանը 2014 թվականի մարտի 7-ին մասնակցել է «Դեմ եմ» նախաձեռնության բողոքի ակցիային: Նախաձեռնության անդամները փակել էին Նալբանդյան փողոցը: Այդ օրը ոստիկանությունը մի քանի անձանց, այդ թվում նաեւ Էդուարդ Մինասյանին, վարչական ձերբակալություն է ենթարկել՝ ոստիկանի օրինական պահանջը չկատարելու համար:
Ռոբերտ Ռեւազյանը հայտարարեց, որ հարցաքննության ընթացում ազատազրկում կատարած անձը զարմացել է, երբ ինքը հարցրել է «Հավաքների ազատության մասին» օրենքի մասին. «Իմ մոտ այնպիսի տպավորություն կար, որ անձը տեղյակ չէր, որ նման օրենք կա»:
Կարդացեք նաև
Ռոբերտ Ռեւազյանը ընդգծեց, որ բողոքի ակցիա կատարելիս ակցիան կատարողները հետիոտնից վերածվում են բողոք կատարող անձի, եւ հետեւաբար՝ ոստիկանությունը պետք է նրանց որպես հետիոտն հաշվի չառներ:
«Արդյոք իրավունքները սահմանափակելիս սահամանափակողը փորձե՞լ է համադրել ճանապարհային երթեւեկության կանոնները եւ «Հավաքի ազատության մասին» օրենքը: Ակնհայտ է, որ փորձ չի իրականացվել, եւ զարմացավ, որ նման օրենք կա եւ արդյոք պե՞տք է այն կիրառել: Նման դեպքերը թաքնված են: Ձերբակալության նպատակն այն չէր, որ անձին իր արարքի համար են ենթարկում, այլ որ պատժեն, վախեցնեն, որ անձն այլեւս չմասնակցի հավաքին»,- ասաց նա
Նա հայտարարեց, որ ակնհայտ է համարում՝ ոստիկանությունը սահմանափակել է Էդուարդ Մինասյանի արտահայտվելու իրավունքը: Անդրադառնալով վկա Ռազմիկ Ղարիմյանի ցուցմունքին՝ Ռոբերտ Ռեւազյանն ասաց. «Երբ զանգահարելու մասին հարց բարձրացավ, նա հասկացավ, որ հնարավոր է ձայնագրություններ ստանալ եւ հասկանալ՝ Էդուարդ Մինասյանը զանգահարե՞լ է, թե՞ ոչ: Այդ պատճառով էլ՝ նա այդ պահը չհիշեց»
Դատավորը գործի քննությունը հայտարարեց ավարտված: Վճիռը կհրապարակվի հունիսի 18-ին:
Ամի ՉԻՉԱԿՅԱՆ
