Մայիսի 26-ին ԱՄՆ նախագահ Բարաք Օբաման Վրաստանի անկախության օրվա առթիվ շնորհավորել է այդ երկրի վարչապետ Իրակլի Ղարիբաշվիլիին: Շնորհավորական նամակում նշված է. «Տարածաշրջանում առկա խնդիրների ֆոնին մենք աջակցում ենք Վրաստանի տարածքային ամբողջականությանը եւ ինքնիշխանությանը»:
Ադրբեջանական 1news.az կայքի փոխանցմամբ՝ անցած տարի էլ Ուկրաինայի անկախության օրվա առթիվ ԱՄՆ-ն շնորհավորել է այդ երկրի նախագահ Պյոտր Պորոշենկոյին եւ բնակչությանը ու, կրկին, աջակցություն է հայտնել Ուկրաինայի ինքնիշխանությանը եւ տարածքային ամբողջականությանը:
Մայիսի 26-ին Բարաք Օբաման Ադրբեջանի անկախության օրվա առթիվ շնորհավորական ուղերձ է հղել նախագահ Իլհամ Ալիեւին, սակայն այլ ձեւով: «Մենք բարձր ենք գնահատում մեր երկկողմ հարաբերությունները, շատ ոլորտներում համագործակցությունը, այդ թվում՝ Լեռնային Ղարաբաղի հակամարտության խաղաղ կարգավորման, Աֆղանստանի կայունության եւ Եվրոպայի էներգառեսուրսների մատակարարման դիվերսիֆիկացման գործերում»:
1news.az-ը դժգոհել է, որ «ԱՄՆ-ն խոսում է իր համար կարեւոր հարցերի մասին, սակայն մոռանում է Ադրբեջանի գլխավոր առաջնահերթության՝ իր սահմանների մասին»:
Կարդացեք նաև
Ադրբեջանական կայքն այս առնչությամբ նաեւ հիշեցրել է նախարար Էլմար Մամեդյարովի այն խոսքերը, թե Արեւմուտքը երկակի չափանիշներ է կիրառում Ադրբեջանի նկատմամբ:
Պատրաստեց Աշոտ ԻՍՐԱԵԼՅԱՆԸ
Ադրբեջանի տարածքային ամբողջականությունը Արցախի հետ կապ չունի: При чем тут Обама?/