Այսօր ԱԺ-ում լրագրողները աշխատանքի եւ սոցիալական հարցերի նախարար Արտեմ Ասատրյանից հետաքրքրվեցին,թե ինչպե՞ս կմեկնաբանի այն աղաղակող փաստերը, որոնք ներկայացրել էր Մարու իրավունքների պաշտպանը:
Օրինակ, խոսքը գիշերօթիկ դպրոցներում տիրող իրավիճակին է վերաբերվում՝ երեխաներին ծեծում են, ստորացնում, սնունդն ու դեղորայքը չի համապատասխանում չափանիշներին:
Նախարարը պատասխանեց, որ նախարարությունը դրանց վերաբերյալ մանրամասն եզրակացություն է տվել. «Ես պատրաստ եմ բոլորին տրամադրել այդ փաստաթուղթը: Ամեն դեպքում որեւէ խնդիր բացառել չի կարելի, որ կա: Դուք շատ լավ գիտեք, որ մեր ընտանիքներում էլ կա խնդիր՝ յուրաքանչյուրի ընտանիքում: Երեխաների հետ կապված դաստիարակության, խնամքի հետ կապված խնդիրները չի կարելի ներկայացնել այն ձեւաչափով, որ դրանք ուղղված են երեխաների իրավունքների ոտնահարմանը: Եթե խնդիրներ կան, իսկ այդ խնդիրներին մենք էլ ենք տեղյակ, պետք է դրանց համակարգային լուծումներ տալ, ոչ թե հատվածական»:
Նախարարն ասաց, որ մոնիտորինգի եւ գնահատման ծառայություն են ներդրել, որը գնահատում է բոլոր հաստատությունների աշխատանքը, խնդիրների հետ կապված տրվում են լուծումներ»:
Կարդացեք նաև
Մեր հարցին՝ բռնության ենթարկված կանանց ժամանակավոր կացարանների հետ կապված նույնպես հնչեց քննադատություն, որ Տեր Թոդիկյան մեթոդներ են կիրառվում, թույլ չեն տալիս հագուստ փոխել լողանալ եւ այլն: Նախարարը պատասխանեց. «Ես նման խնդրի տեղյակ չեմ»:
Հռիփսիմե ՋԵԲԵՋՅԱՆ
