Այսօր ԱԺ-ում, երբ քննարկվում է աշխատանքի եւ սոցիալական հարցերի նախարարության 2014-ի բյուջեի կատարման հաշվետվությունը, ՀԱԿ խմբակցության պատգամավոր Լյուդմիլա Սարգսյանը ցուցադրաբար լքեց նիստը՝ ասելով, որ խտրական վերաբերմունք են դրսևորում իր նկատմամբ:
Ավելի ուշ, երբ Aravot.am-ը հետաքրքրվեց՝ ինչո՞ւ եք հեռանում, ի՞նչ կատարվեց՝ տիկին Սարգսյանը պատասխանեց. «Կարծում եմ, սեռով պայմանավորված խտրականություն է տեղի ունենում»:
Մենք ճշտեցինք՝ սեռո՞վ պայմանավորված խտրականություն է, թե՞ ընդդիմադիր հայացքներով՝ Լյուդմիլա Սարգսյանը պատասխանեց. «Ենթադրում եմ, որ կարծում էին, որ իմ հարցը միգուցե ավելի սուր լինի եւ ավելի քննադատաբար: Ես երրորդ անգամ է ձեռք եմ բարձրացնում, եւ ինձ հերթ չի հասնում, ընդ որում՝ լինելով հանձնաժողովի անդամ: Բնականաբար, ես ցանկություն չունեմ երկար այստեղ ժամանակ կորցնել: Եթե հանձնաժողովի անդամին, սեռով պայմանավորած, այստեղ հնարավորություն չեն տալիս հարց տալու, ուրեմն թող աշխատեն մենակ»:
Թե ինչ հարց էր տալու Լյուդմիլա Սարգսյանը, նա պատասխանեց. «Գործազրկության նպաստների հետ կապված շատ լուրջ հարց ունեի: Կային ինձ չգոհացնող ցուցանիշներ, որոնք այստեղ ես լսեցի: Հիմնականում այդ հարցը այստեղ շոշափվեց, եփվեց, կարծես թե ավարտվեց: Կարծում եմ, այստեղ ես անելիք չունեի, ես շատ վիրավորված եմ: Ստորացուցիչ է, երբ դու հանձնաժողովի անդամ ես, կոնկրետ հարց ունես, երեք անգամ ձեռք ես բարձրացնում, եւ քեզ հնարավորություն չեն տալիս հարց տալու»:
Կարդացեք նաև
Մեր հարցին՝ նկատե՞ց Ձեր ձեռքը Հակոբ Հակոբյանը՝ նա վստահեցրեց, որ այո. «Դիտողություն էլ արեցի, հետո տվեց Վահե Էնֆիաջյանին»:
Մեր հարցին՝ Հակոբ Հակոբյանը հատուկ վերաբերմո՞ւնք ունի կանանց նկատմամբ, որ սեռով պայմանավորված խտրականություն է արել՝ Լյուդմիլա Սարգսյանը պատասխանեց. «Ինձ վատ չի վերաբերվում համենայնդեպս, թե ինչու այդպես արեց՝ չգիտեմ»:
Իշխանությունները ճնշո՞ւմ են ընդդիմադիրներին՝ Լյուդմիլա Սարգսյանն ասաց. «Ինձ ճնշել դժվար է, իհարկե, ես ունեմ իմ մեթոդները: Օրինակ, թողնում եւ հեռանում եմ: Ես գտնում եմ, որ նախեւառաջ կնոջը պետք է ձայն տային, այն էլ՝ հանձնաժողովի անդամին»:
Նա նշեց, որ գրանցված 65 հազար գործազուրկների թիվը չի արտացոլում իրականությունը: Զբաղվածության կենտրոն դիմողների մեծ մասին չի առաջարկվում վերապատրաստման ծրագիր, ընդամենը հայտարարվում է, որ եթե կլինի աշխատանք, մենք ձեզ տեղյակ կպահենք. «Ես համարում եմ, որ այդ ծրագիրը բավարար չէ, որ այս սոցիալական վիճակում գործազրկության նպաստը պիտի պահպանվեր այնքան ժամանակ, քանի դեռ վերապատրաստման հնարավորություն բոլորը կունենային:
Հռիփսիմե ՋԵԲԵՋՅԱՆ
