Սնանկացման եզրին կանգնած գործարար Փայլակ Հայրապետյանը մամուլից է տեղեկացել՝ նախկին վարչապետ, ԱՄՆ-ում Հայաստանի դեսպան Տիգրան Սարգսյանն իրեն դատի է տվել:
Հիշեցնենք, որ ըստ հայցադիմումի` Փայլակ Հայրապետյանը 2015թ. մարտի 24-ին shamshyan.com լրատվամիջոցում Տիգրան Սարգսյանի վերաբերյալ իրականությանը չհամապատասխանող սուտ տեղեկություններով զրպարտչական հայտարարություն է արել: Մասնավորապես, Փայլակ Հայրապետյանը նշել է, որ «Տիգրան Սարգսյանը պետք է գա քննություն տա ու պարզաբանի 7 մլն և 500 հազար դոլարը, որ իր հաշվին նստել է, այդ գումարներն ի՞նչ է արել…»:
Գործարարը Aravot.am-ի հետ զրույցում չհրաժարվեց իր այդ հայտարարությունից, նորից կրկնեց ու ասաց՝ այդ մասին միայն ինքը չի ասել. «Ամբողջ աշխարհն է ասել, ես էլ եմ ասել, ինչ է եղել… այդ գումարները Աշոտ Սուքիասյանի եւ Կճոյանի հաշիվներին է նստել, ճիշտ է հիմա կեղծում են, թե նման բան չկա, բայց ես ոչինչ ինձնից չեմ ասել, փաստաթղթերից ելնելով եմ ասել: Աշոտ Սուքիասյանն է ասել, որ այդ բաներն արել է, որ վարչապետն ու այդ կրոնականը դառնան իր տանիքը: Թող ինքն ապացուցի, որ այդպես չէ, ես էլ կլռեմ»:
Մեր հարցին՝ շատ չէ նախկին վարչապետի պահանջած մեկ միլիոն դրամը՝ զրպարտության համար, գործարարն ասաց. «Դե եթե նրա բարոյականությունը մեկ միլիոն է, իհարկե, շատ չէ: Մեկ միլիոն դրամն ինչ փող է որ բարոյականության համար: Դեռ չեմ ստացել դատարանի ծանուցագիրը, սպասում եմ դրան»:
Կարդացեք նաև
Հիշեցնենք, որ 2009-ին էկոնոմիկայի նախարարության շենքում նախարար Ներսես Երիցյանի մոտ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Փայլակ Հայրապետյանն առաջարկել էր գրավադրել իր 33 մլն դոլար արժողությամբ ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ փախել էր երկրից:
Արփինե ՍԻՄՈՆՅԱՆ
