Հայագիտական հետազոտությունների ինստիտուտի փոխտնօրեն Մհեր Հովհաննիսյանը մայիսյան հերոսամարտերը, Հայաստանի առաջին հանրապետության կերտումը միջազգային լուրջ քայլ է համարում: Նրա համոզմամբ, այդ քայլը նշանակալից էր ոչ միայն Հայաստանի համար, այլեւ քառյակ միության կողմից նախանշված խաղաքարտերը խառնելու առումով:
«Միջազգային քայլ էր նրանով, որ առաջին համաշխարհային պատերազմի ընթացքում, թուրքական բանակը չպետք է սահմանափակվեր միայն Արեւելյան Հայաստանը գրավելու խնդրով, ավելին՝ հաջորդ քայլը պետք է լիներ Բաքու հասնելը: Բաքվի հայությունը կարողացավ դիմադրություն կազմակերպել ու հարյուր հազարների չհասավ սպանդը եւ դա շնորհիվ մայիսյան հերոսամարտերի եւ Սարդարապատի մարտերին էր, որ կանգնեցրինք թուրքական բանակը»,- այսօր «Հայացք» ակումբում ասաց Մհեր Հովհաննիսյանը:
Նրա խոսքով, ՀՀ առաջին հանրապետության հռչակման փաստը փորձում են կուսակցականացնել, բայց չպետք է մոռանալ, որ հռչակումը պայմանավորված էր նաեւ այն հանգամանքով, որ ՀՀ առաջին հանրապետությունը՝ որպես իրավական սուբյեկտ, արդեն գոյություն ուներ:
Արփինե ՍԻՄՈՆՅԱՆ
