Ազգային անվտանգության ծառայության տարածած հաղորդագրություն-զգուշացման վերաբերյալ տեղեկատվական անվտանգության փորձագետ ՍԱՄՎԵԼ ՄԱՐՏԻՐՈՍՅԱՆԸ, կարծում ենք, տեղին դիտարկում էր արել՝ իր «ֆեյսբուքյան» էջում մասնավորապես նկատելով, որ «ասվածը շատ հետաքրքիր է, բայց նման հայտարարության մեջ պետք է լինեն ակտիվ հղումներ պրոֆիլներին կամ սքրինշոթներ (այսինքն՝ կեղծ էջերի՝ լուսանկարի տեսքով ֆիքսված պատկերներ), որոնք թույլ կտան կոնկրետ նույնականացնել կեղծ պրոֆիլները»:
Նրա կարծիքով, առանց դրա, զուտ անուններ նշելով, կարող են հարվածի տակ հայտնվել բազմաթիվ այլ՝ նշվածների անուն-ազգանուններին նույնությամբ համընկնող տվյալներով քաղաքացիներ:
Սամվել Մարտիրոսյանը նաեւ հավելեց. «Նմանատիպ հաղորդագրությունը պետք է կանխարգելիչ լինի, կարծում եմ։ Օրինակ, որ մնացածները, հանդիպելով այդ օգտատերերին, կարողանան զգուշանալ: Սակայն հաղորդագրությունը ոչ մի կերպ չի նկարագրում դրանց: Տալիս է միայն անուն-ազգանունները, ինչը էլ ավելի է խճճում իրավիճակը, քանի որ նման անուն-ազգանուն ունեն կամ կարող են ունենալ օրինապահ քաղաքացիները նույնպես, ու ստացվում է, որ հասարակական կասկածի ստվերը կարող է ընկել նաեւ հասարակ քաղաքացու վրա, որի «մեղքը» միայն նույն անուն ունենալն է»:
Տեղին է, իհարկե, դիտողությունը, բայց նաեւ նկատենք, որ նման բացահայտումից հետո նշված անուն-ազգանուններով գործող ադրբեջանական հատուկ ծառայությունների վիրտուալացված հետախույզները կփակեն կամ կջնջեն այդ պրոֆիլները (եթե, իհարկե, հիմար չեն): Հա, ու կբացեն նորերը, հասկանալի է, հայկական այլ անուն-ազգանուններով:
Ինչեւէ: Այստեղ, կարծում ենք, էականը զգոնության թարմացումն է: Համենայն դեպս միշտ էլ արժե զգոն լինել: Ի վերջո, մարդկանց մեծ մասը իրականում փողոցում, տրանսպորտում առաջին հանդիպածին «կյանքը չի պատմում»: Մինչդեռ վիրտուալ տարածքում նման բաներ պատահում են եւ հաճախ:
Հասկանալի է, որ ոչ մեկը չի հորդորում կամ ցանկանում սահմանափակել մարդկանց շփվելու, հաղորդակցվելու ազատությունն ու հնարավորությունը, բայց ամեն դեպքում պետք է իմանալ, թե ում հետ ես հաղորդակցվում:
Կարդացեք նաև
Արմեն ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
