«Ալյանս» կուսակցությունը հարցումներ է ուղարկել կառավարությանն ու այլ պատկան մարմիններին՝ ՀԷՑ-ի մասնաճյուղերում ամենամսյա գրասենյակային գույքի գնման քանակի ու գնի մասին տեղեկատվություն պարզելու համար:
Կուսակցության փոխնախագահ Սարգիս Հարությունյանն այսօր «Հայացք» ակումբում վստահեցրեց, որ ՀԷՑ-ում չարաշահումներն ակնհայտ են. «ՀԷՑ-ը լուրջ ներդրումներ չի անում, ինչը պարտավոր է անել: ՀԷՑ-ի տնօրենն արդեն չորս տարի է՝ այդ պաշտոնին է, բայց մասնաճյուղերի տնօրեններից ոչ մեկը դեռեւս աշխատանքից չի ազատվել: ՀԷՑ-ը որքան ֆինանսական կորուստներ է կրում, նույն չափով հարստանում են մասնաճյուղի տնօրենները: ՀԷՑ-ում տեսուչները մաքսիմում ստանում են հարյուր հազար դրամ, բայց նրանց ղեկավարները ստանում են միլիոնավոր դրամներ, գնում են թանկարժեք մեքենաներ: Չարաշահումներն ակնհայտ են»:
Նրա խոսքով, մեկ տուփ A4 ձևաչափի թղթերը առավելագույնը 2500 դրամ արժեն, իսկ ՀԷՑ-ը գնում է չորս հազար դրամով. «Չարաշահո՞ւմ չէ, բա ինչ է: Մասնաճյուղի տնօրենները ստանում են նկատողություն, բայց աշխատանքից չեն ազատվում, վատ կառավարո՞ւմ է, իհարկե, վատ կառավարում է: Մասնաճյուղի տնօրեններ կան, որ արդեն տասը տարի տնօրինում են ու ամենայն հավանականությամբ, այդտեղից էլ կգնան թոշակի: Մենք վճարում են՝ ՀԷՑ-ի վատ կառավարման համար»:
Նա լուրջ կասկածներ ունի, որ ՀԷՑ-ն իր չարաշահումների հարցում համագործակցում է ՀՀ իշխանությունների հետ, այլապես գլխավոր դատախազությունը՝ որպես հանցագործության մասին հաղորդում կընդուներ էներգետիկայի եւ բնական պաշարների նախարար Երվանդ Զախարյանի հայտարարությունը՝ ՀԷՑ-ի չարաշահումների, գողության դեպքերի մասին:
Կարդացեք նաև
Նրա կարծիքով, այս անգամ քաղաքացիները չեն թույլ տա էլեկտրաէներգիայի սակագնի թանկացումը. «Իրավիճակը աննախադեպ է լինելու, հասարակությունը լուրջ ճնշում կգործադրի՝ ի տարբերություն նախորդ անգամների»:
Արփինե ՍԻՄՈՆՅԱՆ
