Հայկ Կյուրեղյանի գործով Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանը դատարանի նկատմամբ անհարգալից վերաբերմունք դրսեւորելու պատճառաբանությամբ նիստերի դահլիճից դուրս հրավիրեց դիտորդական խմբի անդամ Նելլի Հարությունյանին, ասելով, թե ծիծաղել է: Իսկ մինչ այդ տեղից խոսելու պատրվակով հեռացվել էր նիստը հետեւող ազատամարտիկ Գագիկ Սարուխանյանը:
Հայկ Կյուրեղյանը դատարան բերվեց, որպեսզի ցուցմունք տա:
Նա հրաժարվեց իր պաշտպանից, ասելով թե պարտադրված պաշտպան չի ուզում: Նկատի ուներ պետության կողմից տրամադրված հանրային պաշտպանին: Երբ պաշտպան Անժելա Հոբոսյանը հեռացավ նիստերի դահլիճից, Հայկին դատավորը հորդորեց կանգնել, դատարանի նկատմամբ ցույց տալ հարգալից վերաբերմունք եւ ցուցմունք տալ:
Հայկ Կյուրեղյանը մնաց տեղում նստած, սկսեց մեղադրական եզրակացության առաջին իսկ տողի հետ կապված պարզաբանում ստանալ:
Կարդացեք նաև
Կյուրեղյանը հարցրեց, թե կա՞ իրավական կատեգորիա, որով մեղադրվում է: Դատախազը ասաց. «Կատեգորիա չլիներ, չէի մեղադրի»:
«Եթե նշում եք կա ենթահոդված, ո՞ր ենթահոդվածն է»,- հարցրեց Հ. Կյուրեղյանը:
Դատախազն ասաց, թե կարող է դիմել դատարանին պաշտպան խնդրել:
Սակայն Կյուրեղյանն ասաց, թե միայնակ կպաշտպանի իրեն:
Պարզաբանման փոխարեն սկսվեց հարցուպատասխան մեղադրողի հետ, որը համարվեց ցուցմունք տալ:
Հ. Կյուրեղյանն ասաց, թե գիտակցել է իր քայլերը, թե պատրաստ էր հանուն արդարության ատոմային ռումբ էլ գցել ոստիկանների վրա, պայքարել բոլոր միջոցներով:
Տուժող ճանաչված ոստիկաններից՝ Աբելյանը հարցրեց, թե «երբ մոտեցա Ձեզ, առաջին երկուսը կպել էր, մեկ-մեկուկես մետրի վրա էիք, խնդրում էի իջնել ավտոմեքենայից, էլի կկրակեիք», Հ. Կյուրեղյանն ասաց, որ նախ ոստիկանն իրեն չի խնդրել: «Գլխիս էիք կրակում»,- նորից պնդեց ոստիկանը, իսկ Հ. Կյուրեղյանն ասաց, ցանկացած անձնավորություն, այդ թվում ոստիկանը, եթե չի թողնի պաշտպանել արդարությունը, կարժանանա այդ պատասխանին:
«Պաշտպանում էի արժանապատվությունը»,- ասաց նա:
Տուժող ոստիկաններից պարոն Ղարիբյանը հարցը տալուց առաջ հիշեցրեց, թե, մինչ կրակելը, Հայկ Կյուրեղյանն «Ազատություն » ռադիոկայանին ասել էր, թե «կխանգարի , կտեսնեք ինչպես»՝ նկատի ունենալով անցյալ տարվա հունիսի 12-ին կայանալիք «Շանթ Հարությունյան եւ ընկերներ» դատական նիստը: Հարցրեց, թե սցենար ունեցել է , Հ. Կյուրեղյանն ասաց. «Ես ունեի դատարանից պաշտպանվել, բոլոր միջոցներով»:
Համարելով ցուցմունքն ավարտված՝ դատարանը Հայկ Կյուրեղյանին դարձյալ հեռացրեց նիստերի դահլիճից, իսկ ընդմիջումից հետո դիմեց հանրային պաշտպանի գրասենյակին՝ կրկին պաշտպան խնդրելով:
Ռուզան ՄԻՆԱՍՅԱՆ
