ՀՀ արդարադատության նախարար Հովհաննես Մանուկյանին այսօր լրագրողներից մեկը հարցրեց, թե անցյալ շաբաթ ԱԺ-ում գլխավոր դատախազն ասաց, որ անձերի հետ կապված խնդիր չունի, ինչպիսի՞ն է նախարարի կարծիքն ասվածի վերաբերյալ, պատասխանեց. «Գիտեք, կոռեկտ չի լինի, որ ես մեկնաբանեմ գլխավոր դատախազի հայտարարությունը: Անձերի խնդիր, եթե դա վերաբերում է պետական լիազորություններին, իմ իշխանական լիազորություններին, ես էլ չունեմ անձերի խնդիր»:
Հարցը հստակեցվեց, թե եթե լինեիք գլխավոր դատախազ եւ օրինակ բերվեց Սյունիքի մարզպետ Սուրեն Խաչատրյանը: Նախարարն ասաց. «Եթե լինեմ, կմեկնաբանեմ: Կիկոսի պատմությունը չեմ սիրում: Հայտարարություն է արվել խորհրդարանում, հաշվետվության ժամանակ: Հանձնաժողովն ընդունել է ի գիտություն»:
Ինչ վերաբերում էր մարզպետի ավտոմեքենայի կրակոցների վերաբերյալ վարկածին, թե դա իմիտացիա էր՝ նա պատասխանեց. «Եթե այդ հարցին պատասխանեմ, միամիտ տպավորություն չե՞մ թողի Ձեր վրա: Լուրջ իրավաբանը, նախարարի պաշտոն զբաղեցնողը կարո՞ղ է նման հարցի պատասխանել սիրողական մակարդակով»:
Իսկ լրագրողներից մեկի հարցին էլ, թե ճի՞շտ է ընթանում ամեն ինչը՝ ակնարկելով կրակոցների գործով նախաքննությունը, նախարարը պատասխանեց. «Թույլ է տալիս հույս ունենալ, որ քննությունը կգա իր տրամաբանական ավարտին եւ օրենքի տեսակետից, եւ ճշմարտության»: Արդարադատության նախարարն իր հաշվետվության մեջ անդրադարձել էր դատական ակտերի հարկադիր կատարողներին: Ըստ նրա, վերջին մեկ տարվա ընթացքում 645 000 կատարողական վարույթ է հարուցվել, ահռելի աշխատանքներ են տարվել այս համակարգում, եւ պետությանն էլ 36 մլրդ.գումար է գանձվել:
Կարդացեք նաև
Aravot.am-ի հարցին, թե ինչպես է, որ ԴԱՀԿ-ի մասին բողոքների կապակցությամբ ընդամենը երկու ծառայողական քննություն է անցկացվել, մի՞թե թիվը համապատասխան է բողոքների տրամաբանությանը, պարոն Մանուկյանն ասաց, որ ծառայողական քննություններն անցկացնում է ծառայության ղեկավարը, իսկ նախարարը վերահսկում է դրանք:
Նախարարի կողմից որոշումները վերանայելու արդյունքում տասներեք դեպքով ի նպաստ քաղաքացու որոշում է փոխվել:
Ինչ վերաբերում է դատապարտյալների իրավունքների խախտման դեպքերին, ցմահ ազատազրկվածների խնդրին, եւ առհասարակ, պայմանական վաղակետ ազատմանը , Հովհաննես Մանուկյանն ասաց, որ ցմահ ազատազրկվածների հարցը քաղաքական որոշման հետ կապ չունի:
«Ցանկացած քաղաքական խնդիր՝ կապված կարեւորագույն ինստիտուտի հետ, ինչպիսին պայմանական վաղակետ ազատման ինստիտուտն է, հատկապես, եթե դա վերցնում ենք ցմահ դատապարտյալների նկատմամբ կիրառման համատեքստում, բնականաբար, օրենսդրական մակարդակով դա քաղաքական հարց է: Եթե մենք որոշում ենք պայմանական վաղակետ ազատման ինստիտուտը բարեփոխել, օրենքներ փոխել, այսօրվա համակարգից հեռանալ, դա պետք է լինի քաղաքական որոշում եւ ԱԺ-ի, եւ կառավարության, եւ հանրապետության նախագահի, որովհետեւ հանրապետության նախագահը վերջում իր ստորագրությամբ պիտի վավերացնի»:
Ըստ նրա, հասարակությանը երկար ժամանակ հուզող խնդիրներից է պայմանական վաղակետ ազատումը: Այս խնդիրն առնչվում է ոչ միայն ցմահների հետ, այլ բոլոր դատապարտյալների, քրեակատարողական հիմնարկների աշխատակիցների:
«Պայմանական վաղակետ ազատումը կարեւոր գործիք է, որը ավանդաբար քրեակատարողական համակարգն օգտագործում է իր գործունեությունն իրականացնելիս, ապահովում է դատապարտյալների նորմալ վարքագիծը»:
Միայն սանկցիաներ կիրառելով դատապարտյալների նկատմամբ, ըստ նախարարի հնարավոր չէ ապահովել բոլոր դատապարտյալների նորմալ վարքագիծը:
Նախարարն ասաց, որ քննարկումներ են եղել մի շարք հասարակական կազմակերպությունների հետ, եւ օրենսդրական առաջարկներ են ձեւավորվել, շրջանառվում են կառավարության օղակներում, եւ քանի որ դա ներքին շրջանառության փաստաթուղթ է, կոնկրետ առաջարկ չներկայացրեց:
Ռուզան ՄԻՆԱՍՅԱՆ
