Այսօր՝ մայիսի 25-ին Մամուլի ազգային ակումբը «Հրատապ թեմա» ծրագրի շրջանակներում հյուրընկալել էր ՀՀ կրթության եւ գիտության նախարար Արմեն Աշոտյանին: Նախարարը խոսեց ՀՀ կառավարության գործունեության մեկ տարվա. ձեռքբերումների եւ կորուստների մասին՝ կրթության եւ գիտության ոլորտների համատեքստում:
Նախարարը հավելեց, որ կառավարության գործունեության ծրագրում մի մեծ բաժին նվիրված է գիտության եւ կրթության հիմնախնդիրներին, կառավարությունը շարունակել է մեկնարկած բարեփոխումները եւ մարտահրավերների լուծումների փնտրտուքը: Արմեն Աշոտյանն ասում է, որ կրթության բնագավառում շատ կարեւոր է, որ լինի առաջընթաց՝ հետևողական քաղաքականության առումով:
«Նախարարների փոփոխությունները կարող են բերել երանգներ քաղաքականության մեջ, եւ չպետք է փոփոխությունները ճակատագրական լինեն, քանի որ կրթական ոլորտը ամենատրադիցիոնն է, եւ այն չպետք է ենթարկվի ցնցումների, ու փոփոխությունները պետք է հարմարեցվեն ոչ միայն մեր տեսլականին, այլև հանրային կարծիքին»,- նշեց Արմեն Աշոտյանը:
Նա թվարկեց բոլոր կարեւոր քայլերը, որ մինչ այժմ իրականացվել են եւ շարունակվում են իրականացվել. «ՀՀ Ազգային ժողովն ընդունել է տասներկուամյա պարտադիր կրթության մասին օրենքը, որը բուռն քննարկումների առիթ դարձավ, իննամյա կրթական ցենզը ՀՀ քաղաքացիների համար այլեւս անցյալ է, պետք է ավելի բարձր նվազագույն ցենզի անցնենք: Մյուսը Ազգային երգուպար առարկայի փորձնական պիլոտային ծրագիրն էր: Այն սեպտեմբերի 1-ին կընդլայնվի՝ ընդգրկելով հարյուր դպրոց, մյուսը «Մեկ աշակերտին՝ մեկ համակարգիչ» ծրագիրն է, որը կմեկնարկի սեպտեմբերի մեկից»:
Կարդացեք նաև
Անդրադարձ եղավ գիտական աստիճանաշնորհման ոլորտում կառավարության նոր ընթացակարգին՝ թեթեւացել են բյուրոկրատական հարցերը, խստացվել պահանջները, ընդունվել է Գիտական փորձաքննության մասին օրենք:
Նախարարը, ի թիվս այլ հարցերի, խոսեց նաեւ Կրթության գերազանցության ծրագրի, վարկային ծրագրերով բուհերում իրականացվող ծրագրերի մասին:
«Մեր մեկ տարվա կրթական գործունեության դափնին համարում եմ Եվրոպական կրթական տարածքի նախարարական համաժողովը, որն աննախադեպ էր իր բնույթով, քաղաքական հետեւանքով: Հայաստանի վարկանիշը Եվրոպական կրթական տարածքում աննախադեպ ընդգծվել է: Այն արձագանքները, որ ստանում ենք Բրյուսելից մինչեւ Մոսկվա, Փարիզից՝ Երեւան, վկայում են այն մասին, որ մեր եռամյա ջանքերը գերհաջողված էին»,- հայտարարեց Արմեն Աշոտյանը:
Նրա ձեւակերպմամբ՝ որեւէ նախաձեռնություն իրենց կողմից չի ձախողվել, բայց դեռ կան համակարգի որոշ խնդիրներ, որոնց ամբողջական լուծումը հնարավոր չէ կարճ ժամկետում, ինչպես կոռուպցիոն դրսեւորումները, կրթության որակի վերջնական բարձրացմումը, կրթության վերաբերյալ հանրային վերաբերմունքի փոփոխությունը:
Գոհար ՀԱԿՈԲՅԱՆ
