ՀՀ կառավարության 2013 թվականի որոշմամբ` կառավարության գործունեության մշակութային քաղաքականության գերակա ուղղություն էր ընդունվել հայկական գորգարվեստի հանրահռչակումը: Այդ համատեքստում, 2013 թվականին իրականացվել են մի շարք միջոցառումներ` հայկական գորգագործական մշակույթի վերաբերյալ տեղեկատվության, պատմության, ավանդույթների տարածման և ոլորտի զարգացման ուղղությամբ, այդ թվում` տրվել էր «Գորգի վիրտուալ թանգարան» կայքէջի ստեղծման մեկնարկը:
Ս. թ. մայիսի 16-ին, «Թանգարանների գիշեր» ծրագրի շրջանակում` Հայաստանի պատմության թանգարանում տեղի է ունեցել հայկական «Գորգի վիրտուալ թանգարան» կայքէջի շնորհանդեսը: Կայքում տեղ են գտել նմուշներ Հանրապետության վեց թանգարանների, մասնավորապես` Հայաստանի պատմության թանգարանի, Հայաստանի ազգային պատկերասրահի, Երևանի պատմության թանգարանի, Հովհ. Շարամբեյանի անվան ժողովրդական ստեղծագործության կենտրոնի, Սարդարապատի Հայոց ազգագրության թանգարանի և Մայր Աթոռ Սուրբ Էջմիածնի Գանձարանի գորգերի հավաքածուներից: Կայքի ստեղծման նպատակն է՝ հայկական գորգերի տեղեկատվության բազայի ամբողջացումը, որն առաջին հերթին կարող է ծառայել որպես սկզբնաղբյուր` գիտական ուսումնասիրությունների համար:
Գորգերից բացի, կայքում կտեղադրվեն նաև հայկական գորգարվեստին նվիրված տարբեր հետազոտություններ, գրքեր և հոդվածներ, որոնք հնարավորություն կտան արտասահմանցի գիտնականներին խորացնել իրենց գիտելիքներն այս ոլորտում, վերանայել իրենց կարծիքներն ու գիտական պնդումները գորգի ծագումնաբանության և սկզբնաղբյուրների վերաբերյալ:
Կայքն ունի կարևոր առանձնահատկություն. յուրաքանչյուր անձ, ով ունի հայկական գորգ կամ կարպետ, կարող է գրանցվել կայքում, մուտքագրել իր գորգի լուսանկարը և լրացնել համապատասխան տեղեկությունները: Կայքի ադմինիստրատոր-մասնագիտական խորհրդի կողմից տեղեկատվության հաստատումից հետո այն կհայտնվի կայքի կատալոգում և կդառնա գորգերի հանրագիտարանի մաս:
Կարդացեք նաև
Կայքը մշտապես կհամալրվի նաև այլ թանգարանների և կառույցների գորգերի հավաքածուներով, ինչպես նաև Արցախի թանգարանների և ցուցասրահների գորգերով:
Ծրագիրը ֆինանսավորվել է Հայաստանի Հանրապետության մշակույթի նախարարության կողմից: Ծրագրի ստեղծմանը մասնակցել է նախարարությանը կից մասնագիտական խորհուրդը:
Կայքը՝ հղումով
https://www.armeniancarpets.am/
ՀՀ մշակույթի նախարարության աշխատակազմի հասարակայնության հետ կապերի բաժին
